काठमाडौं— त्रिभुवन अन्तर्राष्ट्रिय विमानस्थलमा अपरान्ह साढे १२ बजेबाट आन्तरिक उडान आंशिक सञ्चालन भएको छ।

विमानस्थलका महाप्रबन्धक जगन्नाथ निरौलाका अनुसार साढे १२ बजेबाट आईएफआर उडान नियमअनुसार उड्न सक्ने जहाज र विमानस्थलहरूमा उडान खुला गरिएको छ ।

यसअघि नेपाल नागरिक उड्डयन प्राधिकरणले शुक्रबार साँझबाट सबै उडानमा रोक लगाएको थियो । आज भरतपुरबाहेकका विमानस्थलहरू खुला भएको र फाट्टफुट्ट उडान सुरु गरिएको निरौलाले जानकारी दिए ।

उनका अनुसार अहिले भैरहवा, विराटनगर, पोखरा, धनगढी, नेपालगञ्जसहितका विमानस्थलमा उडान सुचारू गरिएको छ ।

अन्तर्राष्ट्रियतर्फ भने उडानहरू नरोकिएको उनले जानकारी दिए । ‘प्रतिकुल मौसमले केही उडानहरू डिले भएका छन्, तर ठप्प भएको अवस्था छैन,’ उनले भने ।