काठमाडौं— नेपाली कांग्रेसका सभापति शेरबहादुर देउवाले राष्ट्रिय स्वतन्त्र पार्टी (रास्वपा) सभापति रवि लामिछानेले सहकारीको रकम अपचलन गरेको पुष्टि भएको बताएका छन्।

बुधबार पार्टी केन्द्रीय कार्यालय सानेपामा एक महिने विशेष अभियानको शुभारम्भ गर्दै उनले यस्तो बताएका हुन्। उनले पार्टीले संसद्मा रास्वपा सभापतिबारे उठाएका प्रश्नहरू अहिले प्रमाणित भएको दाबवी गरे।

उनले संसदीय छानबिन विशेष समिति गठन गर्दाताका रास्वपा सभापति लामिछानेले सहकारी रकम ठगी गरेको भन्नेबारे आफूलाई विश्वास नलागेको भए पनि अहिले प्रमाणित भएको बताए।

उनले पार्टीका महामन्त्री गगन थापालाई सो विषय उठान गरी समिति बनाउन दबाब दिन लगाएकोमा धन्यवाद दिए। उनले रवि लामिछाने चलाख मान्छे भएको भन्दै पार्टी महामन्त्री थापाले उठाएका आवाजहरू सही भएको बताए।

उनले भने, ‘सहकारीसम्बन्धी कुरा हाम्रो महामन्त्री गगन थापाले धेरै अध्ययन गरेर भन्नुभएको छ। उहाँलाई धन्यवाद दिन चाहन्छु, मैले पत्याएकै थिइनँ, यस्तो छ भनेर। सहकारीको विषय। मैले वास्तवमा पत्याएकै थिइनँ, यस्तो छ भनेर। रवि लामिछानेजी त कस्तो मान्छे हुनु हुँदो रहेछ भने चलाख मान्छे। म त छक्कै परेँ कुरा सुनेर। तपाईंले जित्नुभयो, त्यसकारण धन्यवाद तपाईंलाई। जिल्लामा राम्रो संगठन बिस्तार गरौँ। झगडा नगरौँ, मिलाउनेतिर लागौँ।’

सभापति देउवाले पार्टीको संगठन विस्तारमा ध्यान दिन र आन्तरिक झगडालाई मिलाउनेतिर लाग्न पनि निर्देशन दिए।