News Griha :: न्यूजगृह
काँकडभिट्टाबाट दाङ जाँदै गरेको यात्रुबस बाराको उनासी पुलमा पल्टियो

रौतहट— पूर्वपश्चिम राजमार्ग अन्तर्गत बाराको उनासी पुलमा बसको अगाडिको पट्टा भाँचेर सोमबार बिहान यात्रुवाहक दुर्घटना हुँदा ४३ जना घाइते भएका छन्। घाइते मध्ये ८ जनाको अवस्था गम्भीर छ।

काँकडभिट्टाबाट दाङको लागि जाँदै गरेको गएराती १ बजे खुलेको ना ८ ख ११६४ नम्बरको बस अनियन्त्रित भई पुलदेखि ८ मिटर तल खसेर पल्टिँदा बसमा सवार सबै घाइते भएका थिए।

घाइतेमध्ये ३४ जनाको निजगढ स्थित सामुदायिक प्रसुती गृह अस्पतालमा र बाँकीको सीटी अस्पतालमा उपचार भइरहेको छ।

प्रसुती गृहमा उपचाररत मध्ये ६ जना र सीटी अस्पतालमा उपचाररत मध्ये २ जना गरी ८ जनाको अवस्था गम्भीर रहेको  इलाका प्रहरी कार्यालय निजगढका इन्स्पेक्टर सुमित कुशवाहाले बताए।

उक्त बसको अगाडिको पट्टा भाँचेर दुर्घटना भएको प्रहरीको प्रारम्भिक अनुमान रहेको तथा थप अनुसन्धान भइरहेको जिल्ला प्रहरी कार्यालय बाराले जनाएको छ।

प्रकाशित मिति: सोमबार, भदौ ३१, २०८१  ११:११
Weather Update