तातोपानीबाट काठमाडौं आउँदै गरेको जीप भोटेकोशीमा खस्यो, दुईजना बेपत्ता

काठमाडौं— सिन्धुपाल्चोकस्थित भोटेकोशी नदीमा शुक्रबार अपरान्ह खसेको बोलेरो जीपलाई नदीबाट निकालिएको छ।
सिन्धुपाल्चोकको बाह्रबिसे नगरपालिका–६ स्थित बबन्डरटोलबाट गाडी भोटेकोशी नदीमा खसेको थियो।
क्रेनको सहयोगमा बा २० च २१८५ नम्बरको बोलेर गाडी निकालिएको तर गाडीमा रहेका मान्छे फेला नपरेको सिन्धुपाल्चोकका प्रहरी नायब उपरीक्षक निरञ्जन भट्टराईले जानकारी दिए।
उनका अनुसार गाडी तातोपानीबाट काठमाडौं आउँदै गर्दा दुर्घटनामा परेको हो। बोलेरोमा चालक सिन्धुपाल्चोकको भोटेकोशीका ३८ वर्षीय सानु शेर्पा र बाह्रबिसेका सुन्तली तामाङ रहेको बुझिएको उनले बताए।
उनीहरूको अवस्था थाहा हुन नसकेको र खोजी जारी रहेको प्रहरीले जनाएको छ।
प्रकाशित मिति: शुक्रबार, भदौ २८, २०८१ २१:०३