काठमाडौं— ट्वीटरका सीईओ एलन मस्कले २९ अप्रिलमा एउटा ट्वीट गरे । ‘अर्को महिनादेखि यो प्लेटफर्म (ट्वीटर)ले मिडिया प्रकाशकहरूलाई आफ्नो कन्टेन्टको क्लिक गर्दा प्रयोगकर्ताहरूलाई शुल्क लगाउने अनुमति दिनेछ । जसअनुसार ती मिडिया प्रकाशन ‘सब्सक्राइब’ नगर्ने प्रयोगकर्ताले आफूले चाहेको बेला ट्वीटरमार्फत आफ्नो चाहनाअनुसारको कन्टेन्ट पढ्न पाउनेछन् । तर शुल्क तिरेर । यो मिडिया सञ्चालक र जनता दुवैको लागि विन–विन सिचुएसन हो ।’ 

सामान्यतया ठूला मिडिया कम्पनीले आफ्नो कन्टेन्ट पढ्नका लागि प्रयोगकर्तालाई आफ्नो प्लेटफर्ममा सदस्यता लिन लगाउँछन् । ती कम्पनीले सदस्यता लिनका लागि निश्चित रकम तोकेका हुन्छन् । यसरी सदस्यता लिइसकेपछि मात्र प्रयोगकर्तालाई सो प्लेटफर्ममा ‘एक्सेस’ हुन्छ । ट्वीटरको खेल यहीँनेर हो । 

सीईओ मस्कका अनुसार ती मिडिया प्लेटफर्मको सदस्यता नलिएका प्रयोगकर्ताले पनि ट्वीटरको प्लेटफर्ममार्फत आफ्नो रुचीअनुसारको कन्टेन्टमा एक्सेस (पहुँच) पाउनेछन् । ट्वीटरको माध्यमबाट जान मिल्ने त्यस्तो कन्टेन्टको लागि प्रयोगकर्ताले निश्चित रकम तिर्नुपर्ने गरी कम्पनीले आफ्नो प्लेटफर्मलाई कस्टमाइज गर्न लागेको जनाऊ मस्कले दिएका हुन् । उनले उल्लेख गरेका छन्, ‘प्रयोगकर्ताहरूले आफूले चाहेको बेला चाहनाअनुरूपको कन्टेन्ट ट्वीटरमार्फत निश्चित रकम तिरेर पढ्न पाउनेछन् ।’

मस्कले रिट्वीट गर्दै भनेका छन्, ‘यसरी प्रयोगकर्ताले कन्टेन्टबापत तिरेको रकम सबै क्रिएटरलाई जानेछ । हामीले त्यसबापत शुल्क लिने छैनौँ ।’ साथै उनले विश्वभरका कन्टेन्ट क्रिएटरलाई आर्थिक रूपमा सहयोग गरी अझै गजब कन्टेन्टहरू ल्याउन कम्पनीले यस्तो निर्णय गरेको बताएका छन् । 

के गर्नुपर्छ ट्वीटरबाट पैसा पाउन ?

‘कन्टेन्ट क्रिएटर’ले ट्वीटरमार्फत आफ्नो कन्टेन्ट बेच्न सबैभन्दा पहिला ट्वीटरमा ‘मनिटाइज’ हुनुपर्छ । ट्वीटरमा आफ्नो खाता मनिटाइज भएपश्चात् मिडिया प्रकाशक वा क्रिएटरले आफ्नो शैलीअनुसारको कन्टेन्ट हाल्न पाउँछन् । तर, ट्वीटरले कन्टेन्ट उत्पादकलाई सकेसम्म कतै नलेखिएको कन्टेन्ट हाल्न सुझाव दिएको छ । साथै विचार र जानकारीमूलक सामग्रीहरू (जो पाठकका लागि फाइदाजनक छन्) समावेश गरी आफ्ना पाठकसँग साक्षात्कार गरिरहन पनि उत्पादकहरूलाई सुझाव दिएको छ । 

यस्तो खालको ट्वीटर खाता बनाउन क्रिएटर १८ वर्ष पुगको हुनुपर्ने ट्वीटरको नियम छ । क्रिएटर अकाउन्टका लागि कम्तीमा ५ सय फलोअर र एक महिनाभन्दा पुरानो ट्वीटर ह्यान्डल हुन जरुरी हुन्छ । पैसा तिरेर हेर्नुपर्ने कन्टेन्ट सामान्य प्रयोगकर्ताको पहुँचमा भने हुदैन । पैसा तिरेका प्रयोगकर्ताले आफ्नो ह्यान्डलमा रिट्वीट गर्दा पनि सो कन्टेन्ट देखिनेछैन । 

ट्वीटरले आफ्नो अफिसियल साइटमा राखेको ‘डेमो’ अनुसार ४.९९ डलर सदस्यता शुल्क प्रयोगकर्ताले तिर्नुपर्ने हुन्छ । प्रयोगकर्ताले कन्टेन्ट हेरेपश्चात् ट्वीटरले म्यानुअल्ली क्रिएटरको खातामा सो बापतको रकम देखाउँछ । न्यूनतम ५० डलर नपुग्दा सम्म क्रिएटरले सो रकम निकाल्न पाउँदैनन् । बैंक खातासँग कनेक्ट गरेर ट्वीटरमार्फत क्रिएटरले पैसा क्लेम गर्न सक्छन् । यसरी क्लेम गरेको रकम ३ देखि १० दिनभित्र क्रिएटरको बैंक खातामा जम्मा हुनेछ । कन्टेन्टबापतको पैसा क्रिएटरको अकाउन्टमा हालसम्मको रेकर्ड हेर्दा कुनै पनि मनिटाइज्ड प्रोडक्टले ट्वीटरमार्फत ५० हजार डलरभन्दा बढी कमाइ गर्न सकेका छैनन् । ट्वीटरको पछिल्लो घोषणाले क्रिएटरलाई योभन्दा बढी पैसा कमाउनसक्ने बाटो खुला गरेको छ ।

विश्वका विभिन्न देशसँगै छिमेकी मुलुक भारतका क्रिएटरले समेत ‘सब्सक्रिप्सन अकाउन्ट’ खोल्न पाउने भएपनि नेपालको लागि भने यो सुविधा ट्वीटरले दिएको छैन । 

पैसा आफूले नराख्ने भएपछि ट्वीटरलाई के फाइदा ?

नयाँ व्यवस्थापनले जिम्मा लिएसँगै सामाजिक सञ्जाल ट्वीटरमा धेरै फेरबदल आइरहेका छन् । ट्वीटरको पछिल्लो घोषणाले प्रत्यक्ष रूपमा ट्वीटरलाई आर्थिक फाइदा नदेखिएपनि यो प्लेटफर्ममा क्रिएटरको सक्रियता भने विश्वव्यापी बढ्ने निश्चित छ । विश्वभरका उत्कृष्ट र गजबका कन्टेन्टहरू ट्वीटरमा कम पैसामै हेर्न र पढ्न पाउने भएपछि प्रयोगकर्ताहरू पनि सोही अनुपातमा बढ्ने कम्पनीको प्रक्षेपण छ । 

यसरी ट्वीटरमा रेभेन्यूका लागि जोडिने क्रिएटर र मिडिया प्रकाशकहरूले आफ्नो कन्टेन्ट बिकाउनका लागि आफ्नै प्लेटफर्ममार्फत पनि धेरैभन्दा धेरै प्रचार गर्छन् । जसको प्रत्यक्ष फाइदा ट्वीटरलाई हुनेछ । त्योबाहेक ट्वीटरले यस्ता क्रिएटरको अन्य प्लेटफर्ममा पनि सहज रूपमा ‘इन्ट्री’ मार्न पाउनेछ । 

आईओएस, एन्ड्रोइड र वेभ भर्सनमा ट्वीटरले आफ्नो सुविधा उपलब्ध गराएको छ । विश्वभर हाल करिब ४५ करोडको हाराहारीमा ट्वीटर प्रयोगकर्ता रहेका छन् । 

हाल ट्वीटरले आफ्नो प्लेटर्फमा आउने विज्ञापनहरूको रेभेन्यू क्रिएटरहरूसँग बाँड्दै आएको छ । प्रयोगकर्ताबाटै पैसा लिएर शतप्रतिशत क्रिएटरलाई रकम उपलब्ध गराउने ट्वीटरको पछिल्लो निर्णयले विश्वभरका क्रिएटरहरूमा भने खुसी सञ्चार गरेको छ ।