बागलुङ — अविरल झरी र मध्यरातमा आएको बाढीले बगाएर बागलुङमा तीन जनाको मृत्यु भएको छ।

बागलुङ नगरपालिका–५ को बान्द्रेमा बिहीबार राति साढे १२ बजे आएको बाढीले ध २ प ८०१० नम्बरको मोटरसाइकल र ध १ प ९९९६ नम्बरको स्कुटर बगाउँदा स्थानीय २३ वर्षीय अर्जुन सापकोटा, स्थानीय २२ वर्षीय अविशेष रेग्मी र २० वर्षीय कमल सापकोटाको मृत्यु भएको हो। 

प्रहरी निरीक्षक प्रताप पौडेलका अनुसार बाढीले बगाएर तीन सय मिटर तल उनीहरूको शव भेटिएको थियो। दुई जनाको शव राति नै भेटिए पनि २० वर्षीय सापकोटाको शव शुक्रबार बिहानमात्रै भेटिएको हो। स्थानीयवासी र प्रहरी टोली खोजीमा सक्रिय थिए।

बिहीबार बेलुकी ७ बजेदेखि निरन्तर वर्षा भएकोले उद्धारमा कठिनाइ भएको पौडेलले जानकारी दिए। शव पोस्टमार्टमका लागि धौलागिरि अस्पताल ल्याइएको छ।