काठमाडौं— जापानमा यो वर्षको पहिलो ६ महिनामा करिब ४० हजार मानिसहरु घरमा एक्लै मरेका छन्। यो तथ्याङ्क जापानी प्रहरीले सार्वजनिक गरेको प्रतिवेदनमा उल्लेख गरिएको छ।
राष्ट्रिय प्रहरी एजेन्सीका अनुसार तीमध्ये करिब ४ हजार जनाको शव मृत्यु भएको एक महिनापछि फेला परेको थियो भने १३० जनाको शव झण्डै एक वर्षपछि भेटिएको छ।
संयुक्त राष्ट्रसङ्घका अनुसार हाल जापानमा सबैभन्दा बढी वृद्ध जनसङ्ख्या रहेको छ। साथै एक्लोपन पनि गम्भीर समस्याको रुपमा आएको छ। जापानी प्रहरी एजेन्सीले प्रतिवेदनले देशमा एक्लै बस्ने र एक्लै मर्न बाध्य हुने वृद्धवृद्धाहरूको समस्यालाई उजागर गर्न मद्दत गर्ने आशा गरेको छ।
राष्ट्रिय प्रहरी एजेन्सीको तथ्याङ्क अनुसार गत जनवरीदेखि जुन सम्मको तथ्याङ्क विश्लेषण गर्दा घरमा एक्लै बस्ने करिब ३७ हजार २२७ व्यक्ति मृत अवस्थामा फेला परेका छन्। यी मध्ये ७० प्रतिशत व्यक्ति ६५ वा माथिका थिए।
करिब ४० प्रतिशत मानिसको शव एकै दिनमा फेला परेको छ भने करिब ३९३९ जनाको शव मृत्यु भएको एक महिनापछि भेटिएको छ।
एनएचके टीभीका अनुसार पुलिस एजेन्सीले यो तथ्याङ्क सरकारी समूहलाई दिनेछ जसले दाबी नगरिएको मृत्युको अनुसन्धान गरिरहेको छ।
यस वर्षको सुरुमा, जापानिज राष्ट्रिय जनसङ्ख्या र सामाजिक सुरक्षा अनुसन्धान संस्थानले भनेको थियो, 'देशमा ६५ वर्ष र माथिका नागरिकहरूको सङ्ख्या २०५० सम्ममा १०.८ मिलियन पुग्न सक्छ।'
