सप्तरी— जङ्गली जनावरको चोरीशिकारमा संलग्न रहेको आरोपमा पूर्व डीआईजी र बहालवाला सईसहित १० जनालाई प्रहरीले पक्राउ गरेको छ।
हनुमाननगर कङ्कालिनी नगरपालिका–१ कोशी ब्यारेज क्षेत्रबाट अवैध रूपमा बँदेल मारेर ल्याउँदै गर्दा प्रहरीले हतियारसहित उनीहरूलाई नियन्त्रणमा लिएको हो।
पक्राउ पर्नेमा नेपाल प्रहरीका पूर्व डीआईजी ज्ञानविक्रम शाह र बहालवाला सई सञ्जय न्यौपाने छन्। यस्तै पूर्व उपसभामुख गंगाप्रसाद यादवका छोरा आकाश बहरखेर यादव, लक्ष्मण मण्डल, जर्नादन राउत, प्रदीप लिम्बू, रविन दासलाई समेत प्रहरीले पक्राउ गरेको छ।
त्यस्तै, ओमशंकर प्रसैला, लक्ष्मण मण्डल, शंकर खिडहरी यादवलाई पनि पक्राउ गरिएको छ।
प्रहरीले उनीहरूको साथबाट २२ क्यालीबरको राइफल एकवटा, म्यागजिन दुई, १५ राउन्ड गोली, तीनवटा बाइनाकुलर, ट्राइपोर्ट, हतौडा, खुर्पा पनि बरामद गरेको छ।
यस्तै मारिएको बँदेल लोड गरिएको को २ त ६९ नम्बरको ट्रयाक्टर र प्र ३–०१–०२२ च ६८५५ नम्बरको स्कारपियो समेत नियन्त्रणमा लिएको छ। सप्तरी प्रहरीका प्रवक्ता डीएसपी ढुण्डीराज न्यौपानेले घटनाबारे अनुसन्धान भइरहेको बताए।
