काठमाडौं— १ सय ५४ यात्रु राखेर हङकङ उड्नै लागेको नेपाल वायुसेवा निगमको न्यारोबडी जहाज मङ्गलबार पुनः ग्राउण्डेड भएको छ।
शनिबार राति १२ बजे ग्राउण्डेड भएको सगरमाथा नेपाली नाम भएको न्यारोबडी अल्फा किलो व्हिस्कीलाई मङ्गलबार बिहान टर्किस एअरलायन्सबाट झिकाइएको स्पेयर पार्ट्स राखेर मर्मत गरिएको हो।
तीन दिनपछि उडानमा फर्काइएको न्यारोबडीमा १ सय ५४ यात्रु हङकङ जाँदै थिए भने उताबाट आजै राति ४२ जना यात्रु काठमाडौं फर्किने तालिका थियो।
निगम स्रोतका अनुसार हङकङ जान तयार भएको जहाजको भर्याङमा गाडीले ठोकिदिएको हो भने यसको हाइड्रोलिकमा समस्या देखिएपछि निगमका इन्जिनियरहरूले मर्मत गरेका थिए। तर, उनीहरूले जहाज उत्पादकले तोकेको मापदण्ड अनुसार मर्मत नगरेको उजुरी परेपछि प्राधिकरणबाट जाँचमा आएका उडान निरीक्षकले मर्मत गरिएको कागजात हेर्दा नियम उल्लङ्घन गरेको भेट्टाएपछि उक्त जहाजलाई ग्राउण्डेड गरिएको हो।
‘न्यारोबडीको हाइड्रोलिक सम्बन्धी सिल मर्मत गर्दा अनअथोराइज्ड ग्लुले सिट टाँसेको उजुरी परेका आधारमा प्राधिकरणबाट निरीक्षकहरू जाँचमा गएका थिए,’ प्राधिकरणका सहप्रवक्ता ज्ञानेन्द्र भुलले भने, ‘जहाज उत्पादकको मापदण्डबाहिर कुनै पनि स्पेयर पार्ट्स वा अरु सहायक सामग्री मर्मत गर्न पाइँदैन। हामीले सबै कागजात झिकाएका छौँ।’
विमानस्थलका महाप्रबन्धक जगन्नाथ निरौलाका अनुसार निगमसँग अर्को जगेडा जहाज नभएका कारण हङकङ जाने १ सय ५४ यात्रुलाई विमानस्थलभित्र रहेको र्याडिसन होटलको लाउन्जमा राखिएको छ। ती यात्रुलाई आजै राति निगमको अर्को एकमात्र उडानमा रहेको न्यारोबडीबाट उडाउने वा होटलमा राख्नेबारे निगमले केही बताएको छैन।
