म्याग्दी— अन्नपूर्ण गाउँपालिका-२ मा रहेको पर्यटकीयस्थल भुरुङ-तातोपानी कुण्डमा पूर्वाधार निर्माणका लागि विनियोजित करोडौँको योजना कार्यान्वयन हुन सकेको छैन।

अन्नपूर्ण चक्रीय पदमार्ग र मुस्ताङ जाने पर्यटकका लागि विश्रामस्थलको रूपमा रहेको तातोपानी कुण्ड व्यवस्थित बनाउन संघीय सरकारले पठाएको एक करोड ३० लाख बजेटको योजना कार्यान्वयन हुन नसकेको हो। 

अन्नपूर्ण गाउँपालिका-२ भुरुङ-तातोपानीका वडाध्यक्ष ओमप्रकाश फगामीले तातोपानी कुण्ड छेउमा रहेको बेनी–जोमसोम–कोरला सडकको नक्साङन टुङ्गो  लगाउन भएको ढिलाइका कारण पर्यटकीय पूर्वाधार निर्माणका लागि भित्रिएको बजेट र योजना कार्यान्वयन गर्न नसकिएको बताए।

भुरुङ–तातोपानी पूर्वाधार निर्माण शीर्षकमा आर्थिक वर्ष २०७९/८० मा र८० लाख र २०८०/८१ मा प्राप्त भएकोमा ५० लाख बजेट कार्यान्वयन नभएको हो। 

‘यसअघिका दुई आवमा बजेट आए पनि बेनी-जोमसोम-कोरला सडक आयोजनाले कताबाट सडक बनाउने भन्ने टुंगो नलगाएपछि तातोपानी कुण्डमा पूर्वाधार बनाउन सकिएन,’ उनले भने, ‘सडक आयोजनाले अहिले तातोपानी कुण्ड मुनी कालीगण्डकी नदीको किनारै किनार सडक बनाउने नक्सा टुंगो लगाएको छ। तर, संघीय सरकारले यसपालि भुरुङ तातोपानीको पूर्वाधार योजनाका लागि बजेट र योजना कटौती गरेको छ।’ 

जमिनभित्रको मुहानबाट करिब ५० डिग्री तापक्रममा निस्कने प्राकृतिक तातोपानी संकलन गरिएको दुई वटा पोखरी र धारामा स्नान गर्न सकिने भुरुङ–तातोपानी पूर्वाधार अभावमा व्यवस्थित बन्न सकेको छैन। खुला आकासमुनि रहेको कुण्डमा घाम र पानी छेक्ने छानो छैन। खुलारूपमा धारामा स्नान गर्नुपर्छ। कपडा, सामग्री राख्ने र कपडा फेर्न व्यवस्थित ठाउँ आवश्यक छ। सवारीसाधन पार्किङ गर्ने ठाउँ छैन। 

तातोपानीमा शरीर डुबाएर स्नान गर्दा शारीरिक स्फूर्ति बढ्ने, थकान मेटिने, चोट पटक लागेको, सुन्निएको, बज्रिएको समस्या निको हुने जनविश्वास छ। अन्नपूर्ण चक्रीय पदमार्ग र मुस्ताङ जाने आउने पर्यटकका लागि भुरुङ-तातोपानीलाई थकान मेटाउने विश्रामस्थल हो। मुस्ताङको चिसो हावापानीबाट आएका तातोपानीमा स्नान गरेर न्यानो महसुस गर्छन्। 

यसअघि कुण्डको कुनातर्फबाट खोलीएको बेनी-जोमसोम-कोरला सडक विस्तार गरेर ११ मिटर फराकिलो बनाउँदा कुण्डको मुहान र पोखरी पुरिने भएकाले नक्साङ्कन परिवर्तन गर्न स्थानीयवासी, जनप्रतिनिधि र सरोकारवालाले माग गरेका थिए। तातोपानीको मुहान र पोखरीलाई असर नपर्ने तथा कालीगण्डकी नदीको कटान पनि नियन्त्रण हुने गरि कुण्डमुनिबाट सडकको नयाँ नक्साङ्कन गरिएको छ।  

अन्नपूर्ण अध्यक्ष भरतकुमार पुनले नयाँ नक्साङ्कन अनुसार भुरुङ-तातोपानी कुण्ड क्षेत्रमा सडक स्तरोन्नतिका लागि बेनी-जोमसोम–कोरला सडक आयोजनालाई ताकेता गरिएको बताए। संघीय सरकारले पठाएको बजेट कार्यान्वयन हुन नसके पनि गाउँपालिकाको स्रोतबाट तातोपानी कुण्डमा पूर्वाधार निर्माण गरेर व्यस्थित गरिने उनले बताए।

बेनी-जोमसोम-कोरला सडक आयोजना कार्यालयले भुरुङ–तातोपानी क्षेत्रमा बाँकी रहेको सडक स्तरोन्नतिका लागि ठेक्का आह्वानको तयारी गरेको जनाएको छ।