काठमाडौं— सुदूरपश्चिमको मौलिक र महत्वपूर्ण पर्व गौरा सोमबार धुमधामका साथै मनाइँदै छ। त्यसैको अवसरमा काठमाडौंको सैनिक मञ्च टुँडिखेलमा पनि गौराको कार्यक्रम राखिएको थियो।
प्रमुख अतिथि थिए प्रधानमन्त्री केपी शर्मा ओली र विशिष्ट अतिथि थिए सत्ता साझेदार नेपाली कांग्रेसका सभापति एवं पूर्वप्रधानमन्त्री शेरबहादुर देउवा। दुवैले संयुक्त रुपमा दीप प्रज्वलन गरे र कार्यक्रमको उद्घाटन गरे।
सिमसिम पानीबीच सुरु भएको कार्यक्रममा नेताहरूको उपस्थितिलाई सहभागीले रुचाएनन्। र दर्शकदीर्घाबाट सुरु भयो, ‘चोर, देश छोड’, ‘..पाराले, दुख पाए साराले’ को नारा।
प्रधानमन्त्री ओली अर्को कार्यक्रममा जानुपर्ने भन्दै पहिला बोलेर निस्कन खोजे। ओलीले मन्तव्य सुरु गरेलगत्तै कार्यक्रममा उपस्थित दर्शकले नाराबाजी र होहल्ला सुरु गरे। ओलीले छोटो मन्तव्य राखे। तर आक्रोशित भीडप्रति उनले सिधा आक्रोश देखाएनन् घुमाउरो असन्तुष्टि व्यक्त गरे।
उनले नेपालीपन भनेको मेलमिलाप र शान्तिपूर्ण रहेको उल्लेख गरे। केही नयाँ पुस्तामा सभ्यता र शिष्टता नदेखिएको पनि उनले टिप्पणी गरे। ‘नेपालीको परिचय मेलमिलाप हो।’ उनले भने, ‘तर कतिपय नयाँ पुस्तामा सभ्यता, शिष्टता र मर्यादाको ख्याल नभएको देख्दा दुःख लागेको छ।’
सधैँजसो निकै लामो भाषण दिने प्रधानमन्त्री ओलीले होहल्ला र नाराबाजीका कारण कार्यक्रममा लामो बोलेनन्।
जँगिए देउवा
कार्यक्रममा कांग्रेस सभापति एवं पूर्वप्रधानमन्त्री शेरबहादुर देउवा बोल्ने बेलामा पनि भीडले नाराबाजी गर्न छोडेनन्।
देउवा मञ्चमा आउनेबित्तिकै होहल्ला र नाराबाजी सुरु भएपछि देउवाले भने आफूलाई सम्हाल्न सकेनन् र जँगिए।
‘लाज पनि छैन। अर्काको कार्यक्रम बिथोल्ने? लाज नभएकाहरू, यही हो नेपालको संस्कृति? यही हो नेपालको चलन? यही सिकेर आएको? बकवासहरु,’ देउवाले आक्रोश पोखे।
उनले गौरा पर्व बिथोल्नेहरूको कार्यक्रममा घुसपैठ भएको आरोप पनि लगाए।
‘यहाँ गौरा पर्व मनाउन आएकाहरू छन्। देउडा खेल्न आएका छन्। यहाँ न अरूको कुरा सुन्छन्। न देउडा खेल्न दिन्छन्। अरूको कार्यक्रम बिथोल्नेहरू छन्। त्यस्तालाई जनताले ठिक पार्नुपर्छ,’ देउवाले थपे।
