काठमाडौं— सुदूरपश्चिमको महत्वपूर्ण पर्व गौरा मनाउन टुँडिखेलमा जम्मा भएको भिडले आफूविरुद्ध नारा लगाएपछि नेपाली कांग्रेस सभापति शेरबहादुर देउवा कड्किएका छन्।

शुभकामना दिन मञ्चमा पुगेलगत्तै होहल्ला गरेपछि देउवाले ‘हल्ला गर्दै गर्नुस् म आफ्नो कुरा राख्छु,’ भने।

होहल्ला झन् चर्किएपछि देउवा कड्किए, ‘लाज पनि छैन। अर्काको कार्यक्रम बिथोल्ने? लाज नभएकाहरू, यही हो नेपालको संस्कृति? यही हो नेपालको चलन? यही सिकेर आएको ? बकवासहरू।’

​उनले गौरा पर्व बिथोल्नेहरूको घुसपैठ भएको आरोप लगाए। 

‘यहाँ गौरा पर्व मनाउन आएकाहरू छन्। देउडा खेल्न आएका छन्। यहाँ न अरूको कुरा सुन्छन्। न देउडा खेल्न दिन्छन्। अरूको कार्यक्रम बिथोल्नेहरू छन्। त्यस्तालाई जनताले ठिक पार्नुपर्छ,’ देउवाले थपे। 

भिडले आफूहरूलाई नेताहरू नचाहिने भन्दै मुर्दावादको नारा लगाएको थियो।