काठमाडौं— भक्तपुरको गठ्ठाघरमा दुर्घटना भएसँगै सुरु भएको प्रदर्शनमा प्रहरी उपरीक्षक (एसपी) वेद विष्टसहित ३ जना घाइते भएका छन्।

घटनामा भक्तपुरका एसपी विष्ट, प्रहरी सहायक हवलदार बहादुरे राउत र मध्यपुर थिमी नगरपालिका–३ बस्ने सौगात सापकोटा घाइते भएका हुन्। 

काठमाडौंबाट भक्तपुर जाँदै गरेको ना६ ख २१७३ नम्बरको ट्रकले ठक्कर दिँदा बा४९ प ८९४४ नम्बरको स्कुटर चालकको मृत्यु भएको छ। दुर्घटनापछि भेला भएका करिब २ हजार व्यक्तिहरूले सो क्षेत्रमा प्रदर्शन गरेका थिए। 

प्रदर्शन साम्य पार्न भक्तपुरका एसपी विष्टको कमान्डमा ११८ जना, काठमाडौंबाट १३० जनाको थप मद्दत र सशस्त्र प्रहरीका १२० जना सुरक्षाकर्मी घटनास्थलमा खटिएको जिल्ला प्रहरी परिसर भक्तपुरले जनाएको छ।

प्रहरीले २२ राउन्ड अश्रुग्याँस प्रहार गरेर स्थिति नियन्त्रणमा लिएको छ। प्रदर्शनकारीले आक्रमण गर्दा गठ्ठाघरमा रहेको प्रहरी बिटमा क्षति पुगेको छ।