![माइक्रोसफ्टको सर्भर डाउन: विश्वभरका एअरलाइन्स, बैंक र दुरसञ्चार सेवा प्रभावित](https://newsgriha.com/uploads/posts/microsoft-1721384010.jpg)
काठमाडौं— माइक्रोसफ्टको सर्भर डाउन भएपछि शुक्रबार विश्वभरका धेरै बैंक, एअरलाइन्स र दूरसञ्चार सेवाको काम अचानक ठप्प भएको छ।
साथै धेरै टीभी र प्रसारण कम्पनीहरूको प्रसारण पनि बन्द भएको छ। माइक्रोसफ्टको सर्भर डाउन भएका कारण यो समस्या देखिएको हो। माइक्रोसफ्टले यसलाई ठीक गर्न प्रयास गरिरहेको बताएको छ।
सूचना प्रविधि प्रणालीमा खराबीका कारण सिड्नी विमानस्थल र युनाइटेड एअरलाइन्सका जहाजको उडान अवरुद्ध भएको छ।
अमेरिकाको युनाइटेड, डेल्टा र अमेरिकन एअरलाइन्सले विश्वभर आफ्नो उडान बन्द गरेका छन्। हाल उडानमा रहेका बाहेक कुनै पनि जहाजले उडान नगर्ने भएका छन्।
माइक्रोसफ्टले माइक्रोसफ्ट ३६५ एप र अन्य सेवाहरूमा प्रयोगकर्ताहरूलाई समस्या भएको र अहिले समस्याको अनुसन्धान र समाधानको प्रयास गरिरहेको जनाएको छ।
अहिलेसम्म के समस्या आएको हो भन्ने स्पष्ट नभएपनि अस्ट्रेलियाको गृह मन्त्रालयलेले ग्लोबल साइबर सेक्युरिटी फर्म क्राउडस्ट्राइकमा समस्या आएको बताएको छ।