काठमाडौं— प्रधानमन्त्री केपी शर्मा ओलीले आइतबार संसद्बाट विश्वासको मत लिँदैछन्। विश्वासको मत लिने दिन आइतबार नै प्रधानमन्त्री ओलीले संसद्बाट देशवासीलाई सम्बोधन गर्ने तयारीसमेत गरेका छन्।
संसद्मा दुई ठूला राजनीतिक दल नेपाली कांग्रेस र नेकपा एमाले मिलेर ओली प्रधानमन्त्री बनेपछि अब उनको निशाना विश्वासको मत लिँदा दुई तिहाइ पुर्याउने रहेको छ।
२७५ सदस्यीय प्रतिनिधि सभामा दुई तिहाइ मत पुर्याउन ओलीलाई कम्तिमा १८४ मत आवश्यक पर्दछ। ओली कांग्रेसको ८८ र एमालेको ७८ सांसद गरी कुल १६६ सांसदको समर्थनमा प्रधानमन्त्री बनेका हुन्। अहिले कांग्रेस र एमाले बाहेक ७ सांसद रहेको जसपा र ४ सांसद रहेको लोसपा सरकारमा गइसकेको छ। यसरी अहिले ओलीसँग १७७ मत सुरक्षित छ। अब दुई तिहाइ मत पुर्याउन ओलीलाई थप ७ सिट आवश्यक पर्दछ।
अहिले ओलीलाई सरकारमा गएका बाहेक उपेन्द्र यादव नेतृत्वको जसपा नेपालले विश्वासको मत दिने सम्भावना रहेको छ। उपेन्द्र यादवले समाजवादी मोर्चाबाट दूरी बढाएर सरकारलाई समर्थन गर्ने र सत्तामा जाने सङ्केत गरेका छन्। तर उपेन्द्र यादवको सरकारलाई सर्मथन गर्ने प्रमुख शर्त मधेस सरकार हुने देखिएको छ।
मधेसमा अहिले जनमत पार्टीको नेतृत्वमा सरकार छ जसलाई कांग्रेस-एमालेले समर्थन गरिरहेका छन्। तर मधेस सरकारको नेतृत्वसँग खासगरी धेरै सिट भएको कांग्रेस खुशी देखिएको छैन। यसको फाइदा उठाएर उपेन्द्र यादवले केन्द्रमा सरकारलाई समर्थन गर्ने विषयमा छलफल गरिरहेका छन्। जसपा नेपालका ५ सांसद छन्।
त्यस्तै जनमत पार्टीले पनि मधेसमा आफ्नो नेतृत्वको सरकार जोगिने शर्तमा केन्द्रमा सरकारलाई विश्वासको मत दिने गरि छलफल अगाडि बढाएको छ। जनमतको प्रतिनिधि सभामा ६ सांसद छन्। त्यस्तै ४ सांसद रहेको नागरिक उन्मुक्ति पार्टी (नाउपा) आन्तरिक विवादमा मुछिएको अवस्थामा ओली नेतृत्वको सरकारलाई विश्वासको मत दिने तयारीमा रहेको छ। तर नाउपाको विवादले यसको स्पष्ट निर्णय भने अहिलेसम्म बाहिर आएको छैन। नाउपाले पनि विश्वासको मत दिएमा ओलीको पक्षमा दुई तिहाइ भन्दा बढी १९२ मत हुन जान्छ।
यी बाहेक दुई स्वतन्त्र सांसद योगेन्द्र मण्डल र अमरेशकुमार सिंहले पनि ओलीलाई विश्वासको मत दिने सम्भावना छ। मण्डल एमालेबाट टिकट नपाएपछि स्वतन्त्र चुनाव लडेका एमालेकै नेता हुन्। दुई स्वतन्त्र सांसदले मत दिएमा ओलीको पक्षमा १९४ मत हुन जान्छ।
यो बाहेक १४ सिट रहेको राप्रपाले पनि ओली नेतृत्वको सरकारलाई विश्वासको मत दिने विषयमा छलफलमा रहेको छ। राप्रपाले अहिलेसम्म ओली नेतृत्वको सरकारलाई नकारात्मक टिप्पणी गरेको छैन। कांग्रेस-एमालेसँग सहमति भएपछि सुरुमै स्वागत गरेको राप्रपाले पनि विश्वासको मत दिएमा ओलीले संसद्मा २०० बढी मत प्राप्त गर्ने सम्भावना छ।
त्यस्तै संसद्मा रहेका माओवादी केन्द्र, रास्वपा र एकीकृत समाजवादीले भने सरकारलाई विश्वासको मत नदिने र प्रतिपक्षमा बस्ने निश्चित प्राय: छ। तीन दलको गरि प्रतिनिधिसभामा ६३ मत रहेको छ।
त्यसैगरी एकएक सांसद रहेका नेपाल मजदुर किसान पार्टी, आम जनता पार्टी र राष्ट्रिय जनमोर्चाले ओलीको विपक्षमा मतदान गर्ने सम्भावना छ। यसरी हेर्दा ओलीले लिने विश्वासको मतको विपक्षमा ६६ मत पर्ने देखिन्छ।
