काठमाडौं— समाजवादी मोर्चाले आगामी योजना र कार्यक्रम बनाउन ४ सदस्यीय कार्यदल बनाएको छ।
मङ्गलबार नेकपा एकीकृत समाजवादीको केन्द्रीय कार्यालयमा बसेको मोर्चाको बैठकले विगतका अनुभवहरूलाई समीक्षा गरेर नयाँ कार्यक्रम र योजना बनाउन कार्यदल गठन गर्ने निर्णय गरेको हो।
समग्र समीक्षालाई दस्तावेजीकरण गरेर आगामी योजना र कार्यक्रम १५ दिनभित्र तय गर्नेगरी नेपाल कम्युनिष्ट पार्टीका नेता खड्ग विश्वकर्मा, नेपाल समाजवादी पार्टीका नेता गङ्गानारायण श्रेष्ठ, प्रमेश हमाल र देव गुरुङ कार्यदलले काम गर्नेछ।
नेपाल कम्युनिष्ट पार्टीका नेता विश्वकर्माले नेपालको राष्ट्रिय राजनीतिमा हालै भएको घटना, समाजवादी मोर्चाको विगतको काम कारबाही र समग्र देशको स्थितिको बारेमा समीक्षा भएको जानकारी दिए।
उनले नयाँ राजनीतिक घटनाक्रमले प्रगतिशील यात्रातिर अघि बढिराखेको देशलाई यथास्थिति र पश्चगमन एवं विगतको आन्दोलन र उपलब्धिलाई चुनौति दिनेतिर उद्यत् रहेको निष्कर्ष निकालेको पनि बताए।
‘भर्खरै नेपालको राष्ट्रिय राजनीतिमा नयाँ घटना भएको छ। त्यो लगायत समग्र देशको स्थितिको बारेमा र समाजवादी मोर्चाको विगतको काम कारबाहीको बारेमा गम्भीर समीक्षा भएको छ। यो घटनाले प्रगतिशील यात्रातिर अघि बढिराखेको देशलाई यथास्थिति र पश्चगमनतिर, विगतको आन्दोलन र उपलब्धिलाई चुनौति दिनेतिर उद्यत् गर्न खोजिरहेको देखिन्छ। यसमा गम्भीर चिन्ता व्यक्त गरेको छु,' उनले भने, 'समाजवादी मोर्चाको एउटा कार्यदल बनेको छ, यसको समग्र समीक्षालाई दस्तावेजीकरण गरेर आगामी यसको योजना र कार्यक्रमसहित तय गर्नेगरी आगामी १५ दिनभित्र तय गर्नेगरी कार्यदल बनेको छ। त्यसले प्रतिवेदन पेस गर्छ र आगामी बैठकमा छलफल हुन्छ।'
बैठकले महिन्द्र राय यादव नेतृत्वको नेपाल समाजवादी पार्टीलाई समाजवादी मोर्चा नेपालमा आवद्ध गर्ने निर्णय गरेको छ।
