काठमाडौं—प्रधानमन्त्री केपी शर्मा ओलीको नियुक्तिविरुद्ध सर्वोच्च अदालतमा रिट परेको छ। 

संविधानको धारा ७६ को उपधारा (२) बमोजिम प्रधानमन्त्री नियुक्त गरिएको भन्दै त्यसको विरुद्ध सर्वोच्चमा रिट दायर भएको हो। 

आइतबार राष्ट्रपति रामचन्द्र पौडेलले ओलीलाई संविधानको सोही धारा अनुसार प्रधानमन्त्री नियुक्त गरेका थिए।

राष्ट्रपतिले गरेको सरकार गठनको आह्वान, त्यसअनुसार जारी पत्र र शपथ रोक्न माग गर्दै अधिवक्ता दीपक अधिकारी, खगेन्द्र चापागाईं र शैलेन्द्रकुमार गुप्ताले रिट दिएका हुन्।

त्यस्तै यसअघिको पुष्पकमल दाहाल प्रचण्ड नेतृत्वको सरकार पनि संविधानको धारा ७६(२) बमोजिम नै रहेको र उनी पदमुक्त भएपछि सोही धाराबाट पुनः प्रधानमन्त्री नियुक्त गरिएको भन्दै त्यसको खारेजीको माग गरिएको छ। साथै संविधानको धारा ७६(३) बमोजिम सरकार गठनको आदेश दिन माग गरिएको छ। 

‘उपधारा (२) का अनुसार बनेको बहुमतको सरकारले विश्वासको मत पाउन सकेन भने उपधारा ३ अनुसार ठूलो दलका नेता प्रधानमन्त्री हुने हो। अब राष्ट्रपतिले ७६ (३) बमोजिम सरकार गठन गर्न संसद्मा सबैभन्दा बढी सांसद संख्या भएको, दललाई मात्र सरकार गठनका लागि आह्वान गर्नु पर्नेमा संवैधानिक व्यवस्थाविपरित विपरित उपधारा (२) अनुसारको सरकार गठनको अव्हान गर्ने गर्नु भएको निर्णय सोको आधारमा जारी पत्र, नियुक्ति र शपथ समेत यससँग सम्बन्धित सम्पूर्ण निर्णय उत्प्रेषणको आदेशले बदर गरी संविधानको धारा ७६ (३) बमोजिम सरकार गठनको लागी आव्हान गर्नु गराउनु भनी विपक्षीका नाममा परमादेशको आदेश जारी गरी पाउँ,’ रिटमा भनिएको छ।

उक्त रिटको पेसी आगामी साउन ६ गतेका लागि तोकिएको छ। 

यता आजै ओलीले राष्ट्रपति रामचन्द्र पौडेलले ओलीसहित उपप्रधानमन्त्री र मन्त्रीहरुलाई शपथ गराइसकेका छन्।