काठमाडौं— काठमाडौं महानगरपालिकाले कलंकीमा रहेको बर्गर हाउस एण्ड क्रन्ची फ्राइड चिकेनलाई २ लाख रुपैयाँ जरिवाना गरेको छ।
अनलाइनमार्फत् मःम अर्डर गर्ने ग्राहकलाई गन्ध भएको अस्वस्थ्यकर अचार पठाएको पुष्टि भएपछि ‘बजार व्यवस्थापन तथा अनुगमन ऐन’ बमोजिम आज कारबाही गरिएको हो।
महानगरपालिकाले आफ्नै कार्यालय भवनमा सञ्चालित नारायणी चमेना गृहलाई पनि २ लाख रुपैयाँ जरिवाना गरिएको छ। निरीक्षण अधिकृत एवं कृषि तथा पशुपन्छी विभागका प्रमुख नुरनिधि न्यौपाने भन्छन्, ‘चमेना गृहबाट बिक्री हुने खाना तथा खाजाको स्वच्छताका विषयमा उपभोक्ताबाट गुनासो आएपछि खाद्य प्राविधिकले निरीक्षण गरेर लिखित निर्देशन दिइएको थियो। यसरी दिइएको निर्देशनको पनि पालना नभएपछि कारवाही गरिएको हो।’
असार २६ गते बेलुका सवा ६ बजेको अनलाइन अर्डरमा बर्गर हाउसले उपभोक्तालाई पठाएको मःम को अचारमा गन्ध आएको महसुस गरेपछि उपभोक्ताले यो विषय बर्गर हाउसलाई जानकारी गराए।
महानगरपालिकाका खाद्य प्राविधिक अनिल बस्नेत घटनाका बारेमा जानकारी दिँदै भन्छन्, ‘गुनासो आएपछि बर्गर हाउसले फेरि अचार पठायो। यसपटक पठाएको अचारमा पनि गन्ध पाइएपछि उपभोक्ताबाट महानगर प्रहरी बलमा उजुरी आयो। यसरी आएको गुनासोको छानविन गर्दा खानेकुरामा स्वच्छता नभएको पुष्टि भएपछि कारवाही गरिएको हो।’
उजुरीको छानबिनका लागि कार्यालयमा बोलाइएका बर्गर हाउसका सञ्चालक बिक्रम गिरीले मःम को अचारमा गन्ध आएको स्वीकार गर्दै भने, ‘तयार पार्ने बित्तिकै फ्रिजमा राख्नु पर्ने अचार भुलवस बाहिर रहन गएकोले गन्ध आएको हो। यसमा कर्मचारीको लापर्वाही भएको हो। खानाको स्वच्छतामा लापरबाही गर्ने कर्मचारीलाई हामीले पनि कारबाही गरिसकेका छौँ।’
उनले यसपछि गुणस्तरमा कुनै गुनासो नआउने गरी सेवा दिने प्रतिवद्धता गरेका छन्।
