काठमाडौं— मध्य इन्डोनेसियामा अजिङ्गरको पेटभित्र एक महिला मृत फेला परेकी छिन्। 

सिरियाटी नामकी ३६ वर्षीया महिला मंगलबार आफ्नो बिरामी बच्चाका लागि औषधि किन्न बजार निस्किएकी थिइन्। तर उनी लामो समय घर नफर्किएपछि खोजी भएको थियो।  

घटनाबारे जानकारी दिँदै गाउँ सचिव इयाङलेले भनेका छन्, ‘उहाँका श्रीमान् आदियान्साले दक्षिण सुलावेसी प्रान्तको सितेबा गाउँमा आफ्नो घरबाट करिब ५०० मिटर टाढा भुइँमा मृतकको चप्पल र प्यान्ट फेला पार्नुभयो। त्यसको केही समयपछि उहाँले बाटोबाट करिब १० मिटर टाढा एउटा अजिङ्गर देख्नुभएको र उसको पेट धेरै ठूलो देखेपछि आदियान्सालाई शङ्का लागेर गाउँलेहरूको सहयोगमा अजिङ्गरको पेट चिर्नुभएको थियो। पेटभित्र उनीहरूले मृतक सिरियाटीको शव फेला पारेका हुन्।’ 

गत महिना दक्षिण सुलावेसीको अर्को जिल्लामा जालीदार अजिङ्गरको पेटभित्र एउटी महिला मृत फेला परेकी थिइन्। 

गत वर्ष प्रान्तका बासिन्दाहरूले एकजना किसानको घाँटी दबाएर खादै गरेको अवस्थामा आठ मिटर लामो अजिङ्गरलाई मारेका थिए। 

सन् २०१८  मा दक्षिणपूर्वी सुलावेसीको मुना सहरमा सात मिटर अग्लो अजिङ्गरको पेटभित्र ५४ वर्षीया महिला मृत फेला परेकी थिइन्।