काठमाडौं— नेकपा एकीकृत समाजवादीका अध्यक्ष माधवकुमार नेपालले तीन वर्षको घाउ अझै आलो भएकै कारण एमालेका अध्यक्ष केपी ओली महाधिवेशनमा नआएको टिप्पणी गरेका छन्। 

आइतबार आफ्नो पार्टीको दशौं महाधिवेशन उद्घाटन सत्रलाई सम्बोधन गर्दै उनले एमाले अध्यक्ष ओलीलाई दश पटक फोन गर्दा नलागेपछि पीएहरुलाई म्यासेज पठाउँदासम्म महाधिवेशनमा नआएको भन्दै तीन वर्षको घाउ आलो भएकै कारणले नआएको बताए। 

उनले भने, ‘नेकपा एमाले किन आएन भन्ने लागेको होला, मैले आफैँले दशौं पटक फोन गरेको छु। उहाँका पीएहरुलाई लगातार फोन गरेको छु। म्यासेज पनि पठाएको छु डिटेलमा। म्यासेज पाएको पनि सूचना पाएको छु। तर तीन वर्षको घाउ अझै पनि आलो छ। त्यसैको असर बाँकी होला। राजनीतिमा यस्तो कुरा पचाएर जान सक्नुपर्छ। नआउँदाको गुनासो धेरै कुरा नगरौँ। राजनीतिमा घृणा भाव राख्नुपर्ने आवश्यक छैन। यात्रामा यस्तो भइरन्छ।’ 

अध्यक्ष नेपालले प्रधानमन्त्री पुष्पकमल दाहाल प्रचण्डलाई हिजो संसद् विघटन गरेर ठिक गर्नुभयो भन्नेले भोलि फेरि विघटन गर्दिन सक्ने कुरालाई ख्याल गर्न आग्रह गरे। 

उनले भने, ‘प्रधानमन्त्रीज्यू अहिले पनि सुन्दैछु, संसद् विघटन गरेर ठिक गर्‍यौँ भन्दैछन्। हिजो विघटन गरेर ठिक गर्‍यौँ भन्नेहरूले भोलि फेरि विघटन गर्देलान् ख्याल गर्नुस।’