काठमाडौं— दक्षिणी रसियाको रोस्तोभको जेलमा इस्लामिक स्टेट (आईएस) का कैदीहरूले दुई जना जेलका कर्मचारीलाई बन्धक बनाएको रोस्तोभ जेलले आइतबार घोषणा गरेको छ।
 
‘रोस्तोभ क्षेत्रको हिरासत केन्द्र नम्बर एकमा कैदीहरूले दुई जेल कर्मचारीलाई बन्धक बनाएका छन्। बन्धकहरूको रिहाइका लागि वार्ता भइरहेको छ,’ उनीहरूले एक विज्ञप्तिमार्फत जानकारी गराएका छन्।

समाचार एजेन्सी तासका अनुसार बन्धक बनाउनेहरू आतङ्कवादको आरोपमा अदालतमा उपस्थित बाँकी आईएसका सदस्यहरू मध्येका हुन्।

जिहादी सङ्गठनले रुस लक्षित थुप्रै आक्रमण गरेको छ। २२ मार्चमा मस्को नजिकैको कन्सर्ट हलमा बन्दुकधारीहरूले गोली चलाउँदा कम्तिमा १४४ जनाको मृत्यु र सयौँभन्दा बढी घाइते भएका थिए। यो आक्रमण दुई दशकमा रुसी भूमिमा भएको सबैभन्दा घातक आक्रमण थियो। 

आईएसले आक्रमणको जिम्मेवारी लिएको थियो। त्यसपछि पूर्व सोभियत गणतन्त्र ताजिकिस्तानका चार संदिग्ध आक्रमणकारीसहित २० जनाभन्दा बढीलाई पक्राउ गरिएको हो।