काठमाडौं— प्रधानमन्त्री पुष्पकमल दाहाल प्रचण्डले देशलाई नयाँ आशा र विश्वास दिनेगरी सरकारले आगामी आर्थिक वर्षको नीति, कार्यक्रम र बजेट ल्याउने बताएका छन् ।
नेपाल कम्युनिस्ट पार्टी स्थापना दिवसको अवसर पारेर नेकपा एकीकृत समाजवादीले आइतबार काठमाडौंमा आयोजना गरेको एक कार्यक्रममा उनले सो कुरा बताएका हुन् ।
प्रधानमन्त्री दाहालले अहिले आफूहरू सरकारको नीति, कार्यक्रम र बजेट निर्माणको छलफलमा घनिभूत ढङ्गले लागिपरेको उल्लेख गर्दै त्यसले देश र जनतालाई नयाँ आशा र भरोसा दिने दाबीसमेत गरे ।
उनले आफूले छिट्टै भारत भ्रमण गर्ने भएकाले त्यसको राम्रो तयारी पनि गरिरहेको बताए । ‘अहिलेनै फेरि विदेश भ्रमणको पनि प्रक्रिया सुरु हुँदैछ,’ उनले भने, ‘त्यसको पनि राम्रो तयारी गरेर जानुछ ।’
प्रधानमन्त्री दाहालले देश र जनताको हितमा काम गर्न देशभक्त, क्रान्तिकारी कम्युनिस्ट पार्टीहरूबीच एकता गरेर जानुको विकल्प नरहेको पनि बताए ।
