काठमाडौं— भारतको लोकसभा निर्वाचनको मतगणना जारी रहेको छ। आज बिहान ८ बजेदेखि सुरु मतगणनाको सुरुवाती रुझानमा भारतीय जनता पार्टी (भाजपा) नेतृत्वको एनडीए अगाडि देखिएको छ।

अहिलेसम्म करिब ५०० सिटको सुरुवाती रुझानमा एनडीएको २७० र कांग्रेस नेतृत्वको इन्डिया गठबन्धनको २०० सिटमा अगाडि देखिएको छ।

सात चरणमा भएको २८ राज्य र ८ केन्द्र शासित प्रदेशका ५४२ सिटमा लगभग ६५.१४ प्रतिशत मतदान भएको आयोगले जनाएको छ।

भारतमा लोकसभाको निर्वाचन १९ अप्रिल देखि १ जुनसम्म गरि सात चरणमा भएको थियो। यो सन् १९५२ पछिको सबैभन्दा लामो निर्वाचन हो, सन् १९५२ मा निर्वाचन प्रक्रिया ४ महिनासम्म चलेको थियो।

जहाँ सन् १९८० मा मात्र ४ दिनमा निर्वाचन भएको थियो। २०१९ को निर्वाचन ३९ दिनमा सम्पन्न भएको थियो। यसपटक प्रधानमन्त्री नरेन्द्र मोदीसहित ४३ केन्द्रीय मन्त्री, १२ पूर्व मुख्यमन्त्री, ८ फिल्मस्टार र २ पूर्व क्रिकेटर चुनावी मैदानमा थिए।

चुनावपछि सार्वजनिक एक्जिट पोलले हाल सत्तामा रहेका नरेन्द्र मोदी तेस्रो कार्यकालको लागि अत्यधिक बहुमतसहित सत्तामै रहने आकलन गरेका छन्।

५४३ सदस्यीय भारतको लोकसभामा भाजपा नेतृत्वको एनडीए गठबन्धनले ३५० देखि ४०० सम्म सिट जित्न सक्ने अनुमान गरिएको छ। त्यस्तै विपक्षी इन्डिया गठबन्धनले भने आफूहरूको कम्तिमा २९५ सिट आउने र मोदी सरकार बिदा हुने दाबी गर्दै आएका छन्।