काठमाडौं— आईसीसी टी–२० विश्वकप क्रिकेटमा सहआयोजक वेष्ट इन्डिजले विजयी सुरुआत गरेको छ। घरेलु मैदान प्रोभिडेन्स स्टेडियम गायनामा आइतबार राति भएको खेलमा पपुवा न्युगिनी (पीएनजी) लाई ५ विकेटले हराउँदै वेष्ट इन्डिजले विजयी सुरुआत गरेको हो।
पीएनजीले दिएको १ सय ३७ रनको लक्ष्य वेष्ट इन्डिजले १९ ओभरमा ५ विकेट गुमाएर पूरा गर्यो। वेस्ट इन्डिजका लागि रोस्टन चेसले नटआउट ४२, ब्रान्डन किंगले ३४, निकोलस पुरनले २७, आन्द्रे रसेलले नटआउट १५ र कप्तान रोभमन पावेलले पनि १५ रन बनाए।
बलिङतर्फ पीएनजीका लागि कप्तान असद भालाले २ तथा अलेई नाओ र चाद सोपर र जोन कारिकोले समान १/१ विकेट लिए।
त्यसअघि टस हारेर पहिला ब्याटिङको निम्तो पाएको पीएनजीले निर्धारित २० ओभरमा ८ विकेट गुमाएर १ सय ३६ रन बनाएको थियो। पीएनजीका लागि सेसे बाउले ५०, किप्लिन डोरिगा ले नटआउट २५, असद भालाले २१ रन‚ चार्ल्स अमिनीले १२ रन र चाड सोपरले १० रन बनाए।
बलिङतर्फ वेष्ट इन्डिजका आन्द्रे रसेल र अल्जारी जोसेफले २/२ तथा अकिल होसेन‚ रोमारियो सेफर्ड र गुडाकेश मोतीले समान १/१ विकेट लिए। आइतबार अमेरिकामा भएको उद्घाटन खेलमा घरेलु टोली अमेरिकाले क्यानडालाई हराउँदै विजयी सुरुआत गरेको थियो।
प्रतियोगिता अन्तर्गत आज २ खेल हुनेछन्। बिहान सवा ६ बजे सुरु हुने खेलमा ओमान र नामिबिया भिड्नेछन्। आजै राति सवा ८ बजे दक्षिण अफ्रिका र श्रीलंका आमनेसामने हुनेछन्।
