काठमाडौं — भारतमा अत्यधिक गर्मीले ३१ जनाको मृत्यु भएको छ। पूर्वी राज्य उडिसामा गर्मीका कारण १४ जनाको मृत्यु भएको अल इन्डिया रेडिओले जनाएको छ। चिकित्सकहरूले बिहीबार रेकर्ड गरिएका मृत्युहरू चलिरहेको गर्मीको लहरसँग सम्बन्धित हुन सक्ने बताएका छन्।

समाचार अनुसार राउरकेला सरकारी अस्पतालमा १० र सुन्दरगढ जिल्ला मुख्यालय अस्पतालमा चार जनाको मृत्यु भएको हो। उडिसाले तीव्र गर्मीको लहर अनुभव गरिरहेको छ। राज्यका प्रमुख भागहरूमा तापक्रम ४५ डिग्री सेल्सियस भन्दा माथि पुगेको छ। 

अधिकारीहरूले सर्वसाधारणलाई गर्मीसम्बन्धी रोगहरूको उपचारका लागि अस्पतालहरूमा भर्ना गरिएको बताएका छन्। भारतको मौसम विभागले सर्वसाधारणलाई गर्मीको जोखिमबाट बच्न, चिसो ठाउँमा बस्न र पर्याप्त पानी पिएर हाइड्रेटेड रहन सुझाव दिएको सिन्ह्वाले जनाएको छ ।

त्यसैगरी बिहारको औरङ्गावाद जिल्लाको एक अस्पतालमा गर्मीका कारण कम्तीमा पाँच जनाको मृत्यु भएको छ।  यसअघि १२ जना पुगेको बिहारको औरङ्गावादमा तातो लहरका कारण मृत्यु हुनेको सङ्ख्या शुक्रबारसम्म १७ जना पुगेको छ।

बिहारमा २४ जनाले ज्यान गुमाएका छन्। बिहीबार पनि कैमुरमा चुनावी काममा खटिएका एक कर्मचारीसहित चार जनाको मृत्यु भएको बताइएको छ। बिहारको भोजपुर जिल्लाको आराहमा पनि अत्यधिक गर्मीका कारण तीन जनाको मृत्यु भएको एएनआईले उल्लेख गरेको छ।

राज्य सरकारले सबै निजी र सरकारी विद्यालय, कोचिङ संस्थान र आँगनवाडी केन्द्रहरूलाई जुन ८ सम्म बन्द गर्न आदेश दिएको छ। गर्मीका कारण दर्जनौँ विद्यार्थी बेहोस भएपछि यस्तो निर्णय गरिएको हो ।

बिहारमा लोकसभा चुनाव भइरहेको छ। अन्तिम चरणको चुनाव शनिबार हुँदैछ।