सङ्खुवासभा — चीनसँग सीमाना जोडिएका १४ वटा व्यापारिक नाका शनिबारदेखि खुलेका छन्।
एक कार्यक्रमका बीच सङ्खुवासभाको किमाथाङ्कासहित १४ वटा व्यापारिक नाका खुलेको घोषणा गरिएको हो। कोरोनाका कारण २०७६ माघ ५ देखि बन्द रहेका नाका पाँच वर्षपछि एकैसाथ खुलेका हुन्।
नाका खुलेसँगै परराष्ट्रमन्त्री नारायणकाजी श्रेष्ठसहितको टोलीले सङ्खुवासभाको किमाथाङ्का हुँदै चीनको तिब्बत स्वायत्त क्षेत्रसम्म पुगेर अवलोकन गरेका छन्।
त्यहाँका उपाध्यक्ष सिलाङ निमा र परराष्ट्रमन्त्री श्रेष्ठले एक समारोहकाबीच शनिबार १४ वटै व्यापार नाका पुनः सञ्चालन भएको घोषणा गरेका हुन्। परराष्ट्रमन्त्री श्रेष्ठले १४ वटै नाका खुल्ने घोषणा शनिवार एकै साथ भएको बताए।
तुम्लिङटार विमानस्थलमा सञ्चारकर्मीसँग मन्त्री श्रेष्ठले कोभिड महामारीका कारण देखाउँदै चीन सरकारले बन्द गरेका ती नाका नेपाल र चीनका उच्च राजनीतिक नेतृत्वबीचको वार्ता, संवाद र सहमतिबाट करिब चार वर्षपछि पुनः सञ्चालनमा ल्याएको बताए।
सीमा क्षेत्रका जनताको अन्तरक्रिया, व्यापार र सांस्कृतिक क्षेत्रमा योगदान पुग्ने विश्वास व्यक्त गरे। उनले शनिबारदेखि दार्चुला, डोल्पा, मुस्ताङ, गोरखा, दोलखा, ताप्लेजुङ र सङ्खुवासभाको किमाथाङ्काका सीमा जोडिएका नाका खुलेको बताए। चिनियाँ पक्षले अन्य सातवटा नाका निश्चित समयभित्र खुलाउँदै जाने उनले बताए।
