काठमाडौं— नेपाली कांग्रेस संसदीय दलको बैठक सोमबार बिहान ९ बजे बस्दैछ। सहकारीको बचत रकम अपचलनको विषयमा गृहमन्त्री रवि लामिछानेमाथि छानबिन समिति गठनको माग गर्दै आएको कांग्रेसले संसद्मा कसरी प्रस्तुत हुने भन्ने विषयमा धारणा बनाउन संघीय संसद् भवनमा बस्ने गरी दलको बैठक बोलाएको हो।
बैठकअघि सभापति एवम् दलका नेता शेरबहादुर देउवाले संसदीय दल कार्यसमितिमा छलफल गर्दैछन्। कांग्रेसले करिब एक महिनादेखि लामिछानेमाथि संसदीय छानबिन समितिको माग गर्दै आएकोमा आइतबार प्रतिनिधिसभाको बैठकमा सम्बोधन गर्दै आफूले सहकारीको रकम दुरुपयोग नगरेको दाबी गरेका थिए। आजको बैठकमा गृहमन्त्रीको सम्बोधनमाथि समेत छलफल हुने नेताहरुले बताएका छन्।
अब सदनमा कसरी प्रस्तुत हुने भन्ने विषयमा दलको बैठकले निर्णय लिने नेताहरूले बताएका छन्। आइतबार साँझ पत्रकार सम्मेलनका क्रममा महामन्त्री गगन थापाले भने संसदीय छानबिन समिति गठन नभएसम्म संसद् चल्न नदिने बताएका छन्।
संसदीय छानबिन समिति बनाउन विषयमा सत्तापक्ष र प्रतिपक्षबीच शनिबार नै सहमति भइसकेको छ। तर आइतबारको समितिको कार्यक्षेत्रका विषयमा भने सहमति हुन सकेन। कांग्रेसले गृहमन्त्री लामिछानेलाई नै तोकेर समग्र सहकारीको छानबिन गर्नुपर्ने अडान लिएको छ भने सत्ता पक्षले व्यक्ति वा निश्चित संस्था नतोकेर समग्र सहकारीको छानबिन गर्नुपर्ने भन्दै आएको छ।
आइतबारको सम्बोधनमा गृहमन्त्री लामिछानेले आफू निर्दोष रहेको मात्रै दाबी नगरेर धम्कीपूर्ण भाषामा कांग्रेस नेताहरूमाथि लाञ्छना लगाएका कारण संसद्मा कांग्रेस अब झन् कडारूपमा प्रस्तुत हुन सक्ने आकलन समेत भइरहेको छ।
