काठमाडौं— उम्म फाहदको नामले चिनिने इराकी सोसल मिडिया स्टार गुफ्रान सवादीको गोली हानी हत्या गरिएको छ। उनलाई इराकको राजधानी बगदादमा शुक्रबार राति घर बाहिर गोली हानी हत्या गरिएको सीएनएनले उल्लेख गरेको छ।

हमला बगदादको पूर्वमा जायुना क्षेत्रमा भएको थियो। यसलाई निगरानी क्यामेराले भिडिओमा कैद गरी सामाजिक सञ्जालमा शेयर गरेको थियो। भिडिओमा मोटरसाइकलमा सवार बन्दुकधारीले गोली हानेर सावदीको घटनास्थल मै हत्या गरेको देखिन्छ। 

इराकका आन्तरिक मन्त्रीले अज्ञात आक्रमणकारीहरूले सामाजिक सञ्जालमा परिचित महिलाको हत्या गरेको जानकारी दिँदै विशेष कार्य टोली गठन गरेको जानकारी दिएका छन्।

फाहद टिकटकमा निकै लोकप्रिय रहेकी थिइन्। टिकटकमा उनले आफैँलाई फिटिङ कपडामा पप सङ्गीतमा नाच्ने भिडिओहरू साझा गर्ने गर्दथिन्।

उनलाई इराकको अदालतले अश्लील र अभद्र भाषा भएको, सार्वजनिक शिष्टता र नैतिकताको उल्लङ्घन गर्ने धेरै फिल्म र भिडिओहरू निर्माण र प्रकाशन गरेको आरोप लगाउदै छ महिनाको जेल सजाय सुनाएको थियो।