सुनसरी— सुनसरीको बराहक्षेत्र नगरपालिका–१ चतराधाममा गत चैत २७ गतेबाट सञ्चालन भइरहेको बाह्रवर्षे पिण्डेश्वर पूर्ण महाकुम्भ मेलामा शनिबार एकै दिनमा डेढ लाखभन्दा बढी भक्तजन सहभागी भएका छन्।
महाकुम्भ मेला मूल आयोजक समितिका सचिव चन्द्र मगरले शनिबार अहिलेसम्मकै सबैभन्दा धेरै दर्शनार्थी उपस्थित भएका हुन्। आतबारदेखि शुक्रअन्ध सुरु हुने भएकाले शनिबार यति धेरै दर्शनार्थी सहभागी भएको उनको भनाइ छ।
आयोजक समितिले एक महिना करिब ३० लाख दर्शनार्थी सहभागी हुने अनुमान गरेर सोही अनुरूप मेलाको व्यवस्थापन गरेको थियो। सप्तकोसीका स्नान गर्न, कुम्भको दर्शन गर्न, प्रवचन सुन्न र घुमघाम गर्न दर्शनार्थी आइरहेका छन्।
कुम्भमा सहभागी हुन नेपालका विभिन्न स्थानसँगै भारतबाट भक्तजन आउने गरेका छन्। भारतका इलाहावाद, उज्जैन, नासिक, हरिद्वारमा पनि कुम्भमेला लाग्दै आएको छ। सुनसरीको बराह क्षेत्रमा भने २०५९ सालदेखि कुम्भमेला लाग्न थालेको हो। छ–छ वर्षमा अर्धकुम्भ र १२ वर्षमा पूर्ण महाकुम्भ मेला लाग्ने गरेको छ।
हिन्दु धर्मशास्त्रमा बराह क्षेत्रस्थित सप्तकोसी नदी र धरानको पिण्डेश्वर धाम कुम्भमेलासँग जोडिएकाले यो क्षेत्रमा धर्मग्रन्थमा उल्लेखित प्रमाणका आधारमा कुम्भमेला लगाउन थालिएको जगतगुरु बालसन्त मोहनशरण देवाचार्यले बताए। बराह क्षेत्रस्थित चतराधाममा गत चैत २७ गते राष्ट्रपति रामचन्द्र पौडेलले उद्घाटन गरेको महाकुम्भ मेला वैशाख २८ गतेसम्म सञ्चालन हुनेछ।