कांग्रेस सांसद गुरुङको निलम्बन फुकुवा
काठमाडौं— नेपाली कांग्रेसका प्रतिनिधि सभा सांसद टेकबहादुर गुरुङको निलम्बन फुकुवा भएको छ।
संघीय संसद् सचिवालयले बुधवार एक सूचना जारी गर्दै सर्वोच्चको आदेश अनुसार सांसद गुरुङको निलम्बन फुकुवा गरेको जानकारी दिएको हो।
गत चैत १६ गते न्यायाधीशहरू मनोजकुमार शर्मा र विनोद शर्माको संयुक्त इजलासले निलम्बन फुकुवाको आदेश दिएको थियो।
मनाङबाट प्रतिनिधि सभा सदस्यमा निर्वाचित कांग्रेसका सांसद गुरुङ २०७९ पुस १२ गते निलम्बनमा परेका थिए।
गुरुङमाथि अख्तियार दुरुपयोग अनुसन्धान आयोगले गुरुङ विरुद्ध २०७५ माघ २१ गते भ्रष्टाचार मुद्दा दर्ता गरेपछि संसद् सचिवालयले भ्रष्टाचार निवारण ऐन २०५९ को दफा २ (घ) र दफा ३३ बमोजिम मुद्दाको अन्तिम किनारा नभएसम्म स्वत: निलम्बन गरेको थियो।
प्रकाशित मिति: बुधबार, वैशाख १२, २०८१ १८:०७
