मधेस प्रदेशका नवनियुक्त ३ मन्त्री र १ राज्यमन्त्रीले लिए शपथ
काठमाडौं— मधेस प्रदेशका नवनियुक्त ३ मन्त्री र १ राज्यमन्त्रीले पद तथा गोपनियताको शपथ लिएका छन्।
बिहीबार माओवादी केन्द्रका मधेस प्रदेश संसदीय दलका नेता भरतप्रसाद साह, माओवादीकै युवराज भट्टराई र एकीकृत समाजवादीकी बेची लुंगेली मन्त्री र नेकपा एमालेकी सारथा थापा राज्यमन्त्रीमा नियुक्त भएका थिए।
केहीबेरअघि तीन मन्त्रीलाई प्रदेश प्रमुख सुमित्रादेवी भण्डारी र राज्यमन्त्रीलाई मुख्यमन्त्री सरोजकुमार यादवले शपथग्रहण गराएका हुन्।
माओवादीबाट मन्त्री भएका साह र एकीकृत समाजवादीबाट मन्त्री बनेकी लुंगेलीको मन्त्रालय तोकिएको छैन। यसअघि माओवादीले नै नेतृत्व गरेको उद्योग तथा पर्यटन मन्त्रालयको जिम्मेवारी माओवादीकै भट्टरार्ईलाई दिइएको छ।
त्यस्तै वन तथा वातावरण र श्रम तथा यातायात मन्त्रालयको जिम्मेवारी मुख्यमन्त्री यादवले नै लिएका छन्।
प्रकाशित मिति: बिहीबार, वैशाख ६, २०८१ १७:२५