मकवानपुर— बागमती प्रदेशका मुख्यमन्त्री शालिकराम जम्कट्टेलले विश्वासको मत पाएका छन्। सरकार जोगाउन ५६ सांसदको समर्थन चाहिएकोमा मुख्यमन्त्री जम्कट्टेलले त्यति नै मत पाएका हुन्।
मुख्यमन्त्री जम्कट्टेलले माओवादीबाहेक, नेकपा एमाले, नेकपा एकीकृत समाजवादी र हाम्रो नेपाल पार्टीको मत प्राप्त गरे। उनको विपक्षमा ३७ जनाले मत दिए। त्यस्तै, १५ जना तटस्थ बसे।
मुख्यमन्त्री जम्कट्टेललाई एमालेका २७, माओवादी केन्द्रका २१, नेकपा एकीकृत समाजवादीका ७ जना र हाम्रो नेपाली पार्टी (हानेपा)का १ सांसदले मतदान गरेका थिए।
उनको विपक्षमा कांग्रेसले मात्र मत दिएको थियो। राप्रपा र नेपाल मजदुर किसान पार्टीका सांसदले तटस्थमा मतदान गरे। मतदान प्रक्रियामा हानेपाका १ सांसद अनुपस्थित भइन्।
पुरानो सत्ता साझेदार कांग्रेसले समर्थन फिर्ता लिएपछि अल्पमतमा परेका मुख्यमन्त्री जम्मकट्टेलले विश्वासको मत लिएका हुन्।
गत फागुन २३ मा कांग्रेसले आफ्ना ६ जना मन्त्रीलाई फिर्ता बोलाएर सरकारलाई दिएको समर्थन फिर्ता लिएपछि जम्कट्टेललाई विश्वासको मत लिनुपर्ने बाध्यात्मक अवस्था पुगेका थिए।
