काठमाडौं— होली खेल्ने क्रममा ललितपुरमा दुई समूहबीच झडप भएको छ। झडप हुँदा दुई जनाको मृत्यु भएको छ। 

मृत्यु हुनेमा सुनसरीको धरान घर भइ हाल ढोलहिटी बस्ने २८ वर्षीय रोवस राई र पाँचथर जिल्ला घर भइ हाल खुमलटार बस्ने ३० वर्षीय पुजन राई छन्। 

पुजनको शव सुमेरु अस्पताल र रोबर्टको शव पाटन अस्पतालमा राखिएको छ। राति धोलाहिटीमा होली खेल्नेक्रममा आपसी विवादपछि झडप भएको प्रहरीले जनाएको छ। 

जिल्ला प्रहरी परिसर, ललितपुरका प्रवक्ता एसपी नरेशराज सुवेदीका अनुसार घाइतेहरूलाई प्रहरीले उद्धार गरी अस्पताल पुर्‍याएको थियो। अस्पतालमा उपचारकै क्रममा उनीहरूको मृत्यु भएको हो। 

घटनामा संलग्न भएका केहीलाई प्रहरीले नियन्त्रणमा लिएको छ। उनीहरूमाथि सोधपुछको काम भइरहेको सुवेदीले बताए। 

झडपको अवस्था सुन्ने बित्तिकै प्रहरीको टोली घटनास्थल पुगेको सुवेदीले बताए। घटनास्थलबाट धारिलो हतियार पनि बरामद भएको छ।