काठमाडौं— रुसको राजधानी मस्कोको क्रोकस सिटी हलमा भएको आतंकवादी हमलाको जिम्मेवारी इस्लामिक स्टेट (आईएस) ले लिएको छ । 

आतंकवादी संगठनले अमाक समाचार एजेन्सी मार्फत एक विज्ञप्ति जारी गरेको छ । शुक्रबार राति भएको आतंकवादी हमलामा ६० जनाको मृत्यु भएको छ भने १४५ भन्दा बढी घाइते भएको क्रेमलिनले जनाएको छ ।

हमलाको जिम्मेवारी आतंकवादी संगठन आईएसले लिएको छ । आईएसले आफ्नो टेलिग्राम च्यानलमा एक विज्ञप्ति जारी गर्दै भनेको छ, ‘हाम्रा लडाकुहरूले रुसी राजधानी मस्कोको बाहिरी भागमा रहेको क्रोकस कन्सर्ट हलमा हमला गरेका थिए।’ आईएसको विज्ञप्तिमा आक्रमणकारीहरू सुरक्षित रूपमा आफ्नो अड्डाहरूमा फर्किएको पनि भनिएको छ ।

रुसमा पछिल्लो दुई दशकमा भएको सबैभन्दा ठूलो आतंकवादी हमला मानिएको छ । मस्कोका मेयर सर्गेई सोब्यानिनले आक्रमणलाई ‘ठूलो त्रासदी’ भनेका छन् । 

रुसको शीर्ष अनुसन्धान एजेन्सीले गोलीबारी र विस्फोटको घटनालाई आतंकवादी हमलाका रूपमा अनुसन्धान गरिरहेको छ । 

रुसको शीर्ष घरेलु सुरक्षा एजेन्सी फेडरल सेक्युरिटी सर्भिसले गोलीबारीमा एक जनाको मृत्यु भएको र केही अन्य घाइते भएको बताए पनि मृतक वा घाइतेको संख्या भने दिएको छैन ।

रुसी सञ्चारमाध्यमका अनुसार गोलीबारी रुसी राजधानीको पश्चिमी भागमा रहेको क्रोकस सिटी हलमा भएको हो । धेरै अन्य रूसी मिडिया आउटलेटहरूले गोलीबारीको रिपोर्ट गरे र गोलीबारीले साइटको एक मलमा आगलागी भएको बताए । सामाजिक सञ्जालमा पोष्ट गरिएका भिडियोहरूमा भवनको माथिबाट कालो धुवाँको ठूलो मुस्लो उठेको देखाइएको छ । 

प्रख्यात रुसी रक ब्याण्ड ‘पिकनिक’ को कन्सर्टमा सहभागी हुन क्रोकस सिटी हलमा मानिसहरूको भीड जम्मा भएको बेला आक्रमण भएको हो । यो हलमा ६ हजारभन्दा बढी मानिस अट्न सक्छन् ।