काठमाडौं— पोखरलाई आइतबार पर्यटकीय राजधानीका रुपमा घोषणा गरियो। प्रधानमन्त्री पुष्पकमल दाहाल प्रचण्ड पोखरामा एक रात बास नै बसेर राजधानी घोषणा गरे। पञ्चेबाजा बजाएर नाचगान गर्दै पोखरालाई राजधानीका रुपमा घोषणा गरियो।

तर राजधानी घोषणा गर्ने तयारी हुँदाहुँदै व्यवसायीहरू एक थान कागजमा आफ्ना आठ बुँदे माग राखेर प्रधानमन्त्रीलाई भेट्न पुगे। पोखरा पर्यटन परिषद्का अध्यक्ष पोमनारायण श्रेष्ठसहितको टोलीले प्रधानमन्त्रीलाई भेटेर आठ बुँदे माग पेस गर्यो।

आठ बुँदामा मुख्यगरी पोखरा मुग्लिङ सडक खण्डको निर्माण कार्य तोकिएकै समयमा सम्पन्न गर्नुपर्नेमा जोडतोडले माग गरे। पर्यटन बोर्डको पुनःसंरचना सहित हाल रिक्त कार्यकारी बोर्ड सदस्यमा संस्थागत साथै पोखराको प्रतिनिधित्व सुनिश्चित गर्नेगरी प्रकृया अगाडि बढाउनुपर्ने, पोखरा अन्तर्राष्ट्रिय एअरपोर्टबाट अन्तर्राष्ट्रिय उडानका लागि नेपाल एअरलाइन्सबाटै सुरु गरी अन्य एअरलाइन्स लाई पनि सुविधासहितको प्याकेज दिई प्रोत्साहन गर्नुपर्ने माग राखे। 

यस्तै, पोखरा–मुग्लिङ्ग सडक खण्डको निर्माण कार्य समयमै सकी पोखरा–सुनौली राजमार्गको स्तरोन्नति गरिनुपर्ने, नेपाल नागरिक उड्डयन प्रधिकरणलाई पोखरा, धरान र अन्य सम्भाव्य स्थानमा समेत स्थायी सोलो प्याराग्लाइडिङ उडान खुलाउने अनुमतिका निर्देशन दिन भनेका छन्।

व्यावसायीहरूले विशेष रुपमा यातायातको विषयलाई प्राथमिकताका साथ उठाएका छन्। विशेषगरी पोखरासम्म पुग्ने सडक र हवाइ मार्गका विषयमा व्यवसायी बढी चिन्तित छन्। किनकी पोखरा–मुग्लिङ खण्डको स्तरोन्नति सुरु भएको दुई वर्ष बढी बितिसकेको भएपनि काम सुस्त गतीमा छ। राजमार्गको दुरावस्थाले पोखराको पर्यटन क्षेत्र खस्किएको व्यवसायीहरूको दुखेसो छ। 

२०७८ जेठ २ गते पृथ्वी राजमार्गअन्तर्गत पोखरा–मुग्लिङ खण्डलाई ६ लेनमा स्तरोन्नति गर्ने सम्झौता भएपनि सोहीअनुरूप ८८ किलोमिटर लम्बाइको सडकलाई दुई खण्डमा बाँडेर काम सुरु भएपनि गति सुस्त भएको व्यवसायीको भनाइ छ।

त्यस्तै तामझामका साथ १७ पुस ०७९ मा प्रधानमन्त्री दाहालले उद्घाटन गरेको अन्तर्राष्ट्रिय विमानस्थल नियमित अन्तर्राष्ट्रिय उडान नभएकोमा व्यवसायीको चिन्ता छ। त्यस्तै पोखरा महानगरभित्र अन्य प्राविधिक र भौतिक पूर्वाधारको अभाव रहेकोप्रति व्यवसायी बढी चिन्तित छन्।

महानगरका नागरिकका लागि आवश्यक पर्ने सामान्य पूर्वाधारको विकास गर्न नसक्ने मेयर धनराज आचार्यले पोखरालाई पर्यटकको राजधानी घोषणा गर्ने हतार गरेको कतिपय व्यवसायीको आरोप छ।

पोखराका मुख्य चोकमा राखिएको हाइमाक्स लाइट र ट्राफिक लाइट बिग्रिएको, ग्रामीण भेगमा गुणस्तरहीन निर्माण सामाग्री प्रयोग गरेर बनाइएका बाटोहरू गुणस्तरहीन भइ भत्किएको, महेन्द्रपुलमा निर्माण भएको शौचालय खुलाउन नसकिएको लगायतका समस्याहरू ज्युँका त्युँ रहेको व्यवसायीहरूको भनाइ छ।