काठमाडौं— प्रतिनिधि सभाको बैठक आज बस्दैछ। बिहान ११ बजे बैठक बोलाइएको छ।

प्रमुख प्रतिपक्षी नेपाली कांग्रेसले यसअघि शुक्रबार प्रतिनिधि सभा बैठकम नाराबाजी गरेको थियो। कांग्रेसको नाराबाजीपछि प्रतिनिधि सभा बैठक कार्यसूचीमा प्रवेश गर्न सकेन।

आजको बैठकमा शिक्षामन्त्री सुमना श्रेष्ठले राष्ट्रिय सभामा उत्पत्ति भएको शहीद दशरथ चन्द स्वास्थ्य विज्ञान विश्वविद्यालय विधेयक २०८० माथि विचार गरियोस् भन्ने प्रस्ताव प्रस्तुत गर्ने सम्भावित कार्यसूची छ। त्यस्तै आजकै बैठकमा आगामी आर्थिक वर्षका लागि विनियोजन विधेयकका सिद्धान्त र प्राथमिकतामाथि छलफल गर्ने कार्यसूची राखिएको छ।

तर, प्रमुख प्रतिपक्षी नेपाली कांग्रेसले भने सहकारी ठगी प्रकरणमा मुछिएका उपप्रधान तथा गृहमन्त्री रवि लामिछानेका बारेमा प्रधानमन्त्री पुष्पकमल दाहाल प्रचण्डले जवाफ नदिएसम्म बैठक नियमित कार्यसूचीमा प्रवेश गर्न नदिने बताएको छ।

विनियोजन विधेयकका सिद्धान्त र प्राथमिकतामाथिको छलफल भने नरोक्ने कांग्रेसले जनाएको छ।