एमाले संसदीय दलको बैठक आज बस्दै
काठमाडौं— नेकपा एमाले संसदीय दलको बैठक आज बस्ने भएको छ । शनिबार मध्याह्न १२ बजे पार्टी कार्यालय च्यासलमा सुरु हुने बैठक आइतबार पनि बस्ने छ ।
आज र भोलि दुई दिन बस्ने बैठकमा आगामी संसद्मा एमालेले खेल्ने भूमिकाबारे बृहत् रुपमा छलफल हुने सचेतक महेश बर्तौलाले जानकारी दिए ।
बैठकमा अध्यक्ष केपी शर्मा ओलीले पछिल्लो राजनीतिक अवस्थाका साथै एमाले सांसदहरूले संसद्मा खेल्नुपर्ने भूमिकाका बारेमा प्रशिक्षण दिनेछन् ।
संसद्को हिउँदे अधिवेशन यही माघ २२ गते दिउँसो ४ बजेका लागि आह्वान भएको छ । यही माघ २४ गते प्रतिनिधि सभामा संसद्मा प्रतिनिधित्व गर्ने सबै दलका शीर्ष नेताहरूले सम्बोधन गर्ने भएका छन् । त्यसअघि एमालेको संसदीय दलको बैठक बस्न लागेको हो ।
प्रकाशित मिति: शनिबार, माघ २०, २०८० ०८:१६
