काठमाडौं— नेपाली कांग्रेसका नेता शेखर कोइरालाले सिंहदरबारको फोहोर उठाउँदैन भन्नु काठमाडौं महानगरपालिकाको अराजकता भएको टिप्पणी गरेका गरेका छन् ।
बिहीबार सामाजिक सञ्जाल ट्वीटरमार्फत सिंहदरबारको फोहोर नउठेको प्रसङ्गमाथि टिप्पणी गर्दै नेता कोइरालाले सिंहदरबार र काठमाडौँ महानगरपालिका दुवै सच्चिनुपर्ने बताएका छन् ।
जिम्मेवार निकायको अराजक व्यवहारको विरोध गर्नै पर्ने भन्दै कोइरालाले सरकारले पनि महानगरले उठाएका प्रश्नको बेवास्ता गर्दै धम्कीको भाषा प्रयोग गर्न नपाइने बताएका छन् ।
त्यस्तो भाषा प्रयोग गर्नु सिंहदरबारले स्थानीय निकायलाई हेर्ने दृष्टिकोणको प्रतिविम्ब भएको भन्दै उनले दुवै सच्चिनुपर्ने उल्लेख गरेका छन् । 'कामपाले सिंहदरबार लगायत स्थानको फोहोर नउठाउनु अराजकता हो । जिम्मेवार निकायको यो व्यवहारको सबैले विरोध गर्नैैपर्छ', नेता कोइरालाले लेखेका छन्, 'अर्कोतर्फ सरकारले पनि महानगरले उठाएका प्रश्नको बेवास्ता गर्दै धम्कीको भाषा प्रयोग गर्नु सिंहदरबारले स्थानीय निकायलाई हेर्ने दृष्टिकोणको प्रतिविम्ब हो । दुवै सच्चिनु पर्छ ।'
आइतबार काठमाडौं महानगरपालिकाका प्रमुख बालेन्द्र शाह (बालेन)ले सिंहदरबार, बालुवाटार र शीतल निवासका फोहोर नउठाउने बताएसँगै अहिले त्यहाँको फोहोर उठेको छैन । सोही प्रसङ्गलाई लिएर नेता कोइरालाले सामाजिक सञ्जालमार्फत सिंहदरबार र काठमाडौँ महानगर दुवै सच्चिनुपर्ने बताएका हुन् ।
महानगर प्रमुख बालेन अराजक बन्दै गएको भन्दै मन्त्रिपरिषद्को बैठकले जिम्मेवारी बोध गरी काम गर्न उनलाई निर्देशनसमेत दिएको थियो । प्रमुख बालेनले केन्द्रीय सरकारले आफूलाई सहयोग नगरेको बताउँदै आइरहेका छन् ।
बिहीबार पनि प्रमुख बालेनले सामाजिक सञ्जालमार्फत नेताहरूलाई काठमाडौंको हितमा काम नगरे सिंहदरबार अरू पालिकामा सार्न अनुरोध गरेका थिए ।
कामपाले सिंहदरवार लगायत स्थानको फोहोर नउठाउनु अराजकता हो,जिम्मेवार निकायको यो व्यवहारको सबैले विरोध गर्नैैपर्छ।अर्कोतर्फ सरकारले पनि महानगरले उठाएका प्रश्नको वेवास्ता गर्दै धम्कीको भाषा प्रयोग गर्नु सिंहदरवारले स्थानीय निकायलाई हेर्ने दृष्टिकोणको प्रतिविम्ब हो।दुबै सच्चिनु पर्छ।
— Dr Shekhar Koirala (@Shekharnc) April 13, 2023
