काठमाडौं— आजदेखि शहीद सप्ताह सुरु भएको छ । पहिलो दिन आज काठमाडौं महानगरपालिकाले एक कार्यक्रम गरी सहिद शुक्रराज शास्त्री र उनको योगदानलाई सम्झिएको छ ।
उपमेयर सुनिता डङ्गोलसहित महानगरका अधिकारीहरूले टेकुको पचलीस्थित शास्त्रीको सालिकमा माल्यार्पण गरेका छन् । उपमेयर सुनिता डङ्गोलले शास्त्रीको योगदान नेपाली राजनीतिमा मात्र नभएर नेपाली र नेपाल भाषाको साहित्यमा पनि उत्तिकै रहेको बताइन् ।
‘उहाँको योगदान नेपाली राजनीतिमा मात्र होइन, साहित्यमा पनि उत्तिकै छ । नेपाली र नेपाल भाषामा उहाँले कलम चलाउनुभयो । विशेषगरी नेपाल भाषाको व्याकरण लेख्ने उहाँ नै पहिलो व्यक्ति हो,’ उपमेयर डङ्गोलले भनिन्, ‘त्यो मात्रै होइन बाल साहित्यमा कलम चलाउने पहिलो व्यक्ति पनि उहाँ नै हो ।’
नेपाली जनताको स्वतन्त्रता, राष्ट्र निर्माण र आम नागरिकको हक अधिकार र मुक्तिको लागि आफ्नो ज्यानको आहुति दिने शहीदहरूको सम्झनामा प्रत्येक वर्ष माघ १० देखि १६ गतेसम्म शहीद सप्ताह मनाउने गरिन्छ ।
नागरिकको हक हितका लागि तत्कालीन व्यवस्थाविरुद्ध विद्रोह गर्दा १९९७ साल माघ १० गते टेकुको पचलीमा रहेको खरीको बोटमा झुन्डाएर शास्त्रीको हत्या गरिएको थियो ।
शास्त्रीलाई झुन्ड्याइएको रूख भएको ठाउँमा नै बुधबार महानगरपालिकाले श्रद्धाञ्जली सभा गरेको हो । सरकारले शहीद शुक्रराज शास्त्रीको सम्झनामा शुक्रराज ट्रपिकल तथा सरुवा रोग अस्पताल सञ्चालन गरेको छ ।
