काठमाडौं— सुर्खेतको पञ्चपुरी नगरपालिकामा १८ वर्षीय युवकको हत्या भएको पाइएको छ । मंगलबार बिहान मृत फेला परेका पञ्चपुरी नगरपालिका–६ कुवापानीका भरत बुढाको हत्या भएको प्रहरीले जनाएको हो ।
मृतक युवकको शरीरमा घरेलु धारिलो हतियार प्रयोग गरेर हत्या गरिएको जिल्ला प्रहरी कार्यालय सुर्खेतले जनाएको छ । मृतक युवकको शरीरका विभिन्न भागहरूमा चोट लागेको अवस्थामा फेला परेका थिए ।
'शरीरमा धारिलो हतियार प्रयोग गरेर हत्या भएको अनुसन्धानमा भेटिएको छ,’ जिल्ला प्रहरी कार्यालय सुर्खेतका प्रमुख प्रहरी उपरीक्षक योगेन्द्रसिंह थापाले भने, 'शरीरभरि चोट छ, हत्यारालाई चाँडै नै पत्ता लगाउने छौं । मृतक युवकको लाश पोस्टमार्टमका लागि प्रदेश अस्पताल सुर्खेतमा ल्याइएको छ ।’
उनका अनुसार थप अनुसन्धानका लागि नेपालगन्जबाट तालिमप्राप्त कुकुरसहितको टोली पञ्चपुरी पुगेर अनुसन्धान भइरहेको छ । घटनाको बारेमा थप अनुसन्धान भइरहेको छ ।
