रौतहट— रौतहटको चन्द्रपुर–५ स्थित पूर्वपश्चिम राजमार्गको चिडियादह चोक नजिक सर्लाही जाँदै गरेको ट्याङ्करले पूर्वबाट आउँदै गरेको अटोलाई सोमबार राती ठक्कर दिँदा त्यसमा सवार दुई भारतीयको मृत्यु भएको छ ।
दुर्घटनामा गम्भीर घाईते दुवैको वीरगञ्जमा उपचारको क्रममा राति मृत्यु भएको हो ।
बागमतीको नुनथरबाट चन्द्रनिगाहपुर आउँदै गरेको गरेको ज १ ह ४४८५ नम्बरको अटोलाई अमलेखगञ्जबाट सर्लाही जाँदै गरेको प्रदेश २–०३–००१ ख १९२७ नम्बरको तेल बोक्ने ट्याङ्करले ठक्कर दिएको थियो ।
अटोमा सवार भारतको सितामाढी जिल्ला डुमरी बस्ने ३५ वर्षिय पिंकु सिंह र सोही गाउँ बस्ने २२ वर्षिय अवधेश झाको मृत्यु भएको इलाका प्रहरी कार्यालय चन्द्रनिगाहपुरले जनाएको छ ।
मृतक दुवै अंग्रेजी नयाँ वर्ष मनाउन चन्द्रपुर–१ स्थित वाग्मतीको नुनथर आएका थिए । साँझ उनीहरु टेम्पो चढेर चन्द्रनिगाहपुरतर्फ आउँदै गर्दा ट्याङ्करले ठक्कर दिएको थियो ।
प्रहरीका अनुसार टेम्पोमा ६ जना सवार थिए ।
