अमेरिका पठाइदिने भन्दै २६ लाख ठगी गरेको आरोपमा ५९ वर्षीय ठकुरी पक्राउ
काठमाडौं— वैदेशिक रोजगारीका लागि अमेरिका पठाइदिने बहानामा २६ लाख रुपैयाँ ठगी गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा काठमाडौंको बूढानीलकण्ठ नगरपालिका ३ बस्ने ५९ वर्षीय भैरवबहादुर ठकुरी छन् ।
ठकुरीले कृतेश खरेलसमेत २ जनालाई वैदेशिक रोजगारीको लागि अमेरिका पठाइदिन्छु, त्यसको लागि प्रतिव्यक्ति १३ लाख रुपैयाँ लाग्छ, अमेरिका पुगेपछि प्रतिष्ठित कम्पनीमा काम लगाइदिन्छु, मासिक ३ लाख रुपैयाँ तलब हुन्छ भनी २६ लाख रुपैयाँ रकम लिई सम्पर्क विहीन भएको प्रहरीले जनाएको छ ।
काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले ठकुरीलाई मंगलबार बूढानीलकण्ठ –४ पासीकोटबाट पक्राउ गरेको हो ।
उनीविरुद्ध थप अनुसन्धान तथा कारबाहीको लागि वैदेशिक रोजगार विभाग ताहाचल पठाइएको प्रहरीले जनाएको छ ।
प्रकाशित मिति: बिहीबार, पुस १२, २०८० ०६:१०
थप समाचार
