प्रहरी हत्या आरोपमा सफाइ पाएका सांसद कोइरीले दिए निलम्बन फुकुवाको निवेदन
काठमाडौं— नेकपा एमालेका सांसद लक्ष्मी महतो कोइरीले सांसद पदको निलम्बन फुकुवा माग गर्दै संघीय संसद् सचिवालयमा निवेदन दिएका छन् ।
जिल्ला अदालत महोत्तरीबाट सफाइ पाएकाले सांसदको रुपमा संघीय संसद्मा सहभागी हुन पाउनुपर्ने माग उनले निवेदनमा गरेका छन् । संघीय संसद्का निमित्त महासचिव पदमप्रसाद पाण्डेयले निवेदन आएको बताए । ‘पत्र प्राप्त भएको छ, निर्णयको प्रक्रियामा छ’, उनले भने ।
मधेस आन्दोलनमा सशस्त्र प्रहरी बलका असई थमन बिकको हत्या आरोपमा पुर्पक्षका लागि थुनामा पठाउने आदेश दिएपछि फरार रहेका कारण महोत्तरी– १ बाट निर्वाचित कोइरी हाल निलम्बित अवस्थामा छन् ।
मंसिर २८ मा महोत्तरी जिल्ला अदालतले थमन बिक हत्याको मुद्दामा सफाइ दिएपछि सांसद कोइरीले निलम्बन फुकुवा गर्न र अहिलेसम्मको सेवा सुविधा माग गर्दै संघीय संसद् सचिवालयमा पत्र लेखेका हुन् ।
प्रकाशित मिति: आइतबार, पुस ८, २०८० १५:४५
