काठमाडौं— काठमाडौं महानगरपालिकाका मेयर बालेन साहको निर्देशनपछि आइतबारबाट उठ्न छोडेको सिंहदरवारको फोहोर मंगलबार पनि उठेन ।

संघ सरकारले आफूलाई नागरिकका समस्या समाधानमा सहयोग नगरेको भन्दै मेयर साहले सिंहदरवार, बालुवाटार र शीतलनिवास फोहोर नउठाउन परिवर्तन सेवा प्रालि लाई निर्देशन दिएका थिए ।

राजनीतिक दलका नेताहरूले जिम्मेवार पदमा बसेर गैरजिम्मेवार अभिव्यक्ति दिएको भन्दै मेयर साहले फोहोर नउठाउन निर्देशन दिएका हुन् ।

सिंहदरवारबाट फोहोर नउठाएपछि अहिले त्यहाँको फोहोर पुतली बगैँचामा थुपारिएको छ । महानगरको गैरजिम्मेवारीपनप्रति केन्द्र सरकारले अहिलेसम्म कुनै प्रतिक्रिया दिएको छैन ।

मेयर बालेनले भने सरकारले वार्तामा नबोलाएसम्म सिंहदरवारको फोहोर नउठ्ने ढिपी कसेका छन् ।