काठमाडौं— दूरसञ्चार सेवा प्रदायक कम्पनी एनसेलको शेयर स्वामित्व खरिद बिक्री रोक्न माग गर्दै प्रतिनिधिसभा सदस्य अमरेशकुमार सिंहले सर्वोच्च अदालतमा दिएको रिट हेर्न नभ्याइनेमा परेको छ ।
सांसद सिंहले मलेसियाली कम्पनी आजियटाले आफ्नो स्वामित्वमा रहेको एनसेलको शेयर गैरआवासीय नेपाली सतिशलाल आचार्यको कम्पनीलाई गरेको भनिएको बिक्री रोक्न माग गर्दै शुक्रबार रिट दायर गरेका हुन् । सोही रिट निवेदनमाथि प्रारम्भिक सुनुवाइका लागि आइतबारका लागि पेसी तोकिएको थियो ।
आइतबार उक्त रिट सर्वोच्च अदालतका न्यायाधीश कुमार रेग्मीको एकल इजलासमा पेसी तोकिएको थियो । तर सुनुवाइ हुने भने पनि हेर्न नभ्याइनेमा परेको हो ।
आजियटाले रेनोल्ड होल्डिङ्स नामक कम्पनीको सबै शेयर बेलायतमा स्थापना भएको स्पेक्ट्रलाइट यूके लिमिटेडलाई बेच्ने निर्णय गरेको थियो । शेयर खरिदबिक्रीको निर्णय सार्वजनिक भएलगत्तै विभिन्न तहबाट प्रश्न उठेको छ ।
पूँजीगत लाभकर छल्ने उद्देश्यले वास्तविक भन्दा कम मूल्यमा शेयर बिक्री गर्न खोजिएको सांसद सिंहले दाबी गरेका छन् । आजियटाले टेलिकम क्षेत्रका व्यवसायी सतिशलाल आचार्यलाई ५० मिलियन अमेरिकी डलर (करिब ६ अर्ब ६५ करोड रुपैयाँ) मा शेयर बिक्रीको घोषणा गरेको थियो ।
