काठमाडौं— दाङमा एक पुरूषलाई चक्कु प्रहार गरेको आरोपमा तीन युवक पक्राउ परेका छन् ।
गत कात्तिक ३० गते राति घोराही उपमहानगरपालिका १५ गोर्खा हस्पिटल नजिकै हिँडिरहेका सोही वडाका २१ वर्षीय कृतिक रोका मगरमाथि चक्कु प्रहार भएको थियो ।
पछाडिबाट ढाडमा गरिएको चक्कु प्रहारबाट गम्भीर घाइते रोकालाई उद्धार गरी घोराहीस्थित राप्ती स्वास्थ्य विज्ञान प्रतिष्ठानमा लगिएको थियो । त्यहाँ उपचार सम्भव नभएपछि बाँकेको कोहलपुर मेडिकल कलेजमा रेफर गरिएको थियो।
घाइते रोकालाई कोहलपुर मेडिकल कलेजले ललितपुरस्थित मेडिसिटी हस्पिटलमा थप उपचारका लागि रेफर गरेको छ । हाल उनको मेडिसिटीमा उपचार जारी छ ।
रोकामाथि चक्कु प्रहार गरेको आरोपमा घोराही-९ का २४ वर्षीय शैलेश शाह, घोराही-१८ का मिस्चल बुढा मगर र घोराही-१५ का २५ वर्षीय निश्चल श्रेष्ठलाई शुक्रबार दिउँसो नियन्त्रणमा लिएको जिल्ला सूचना अधिकारी प्रहरी निरीक्षक सुनिल थापा मगरले बताए ।
