कञ्चनपुर— दुई दशकदेखिको जग्गा अंश सम्बन्धी विवाद दुई दिनमै मिलापत्र भएपछि शुक्लाफाँटा नगरपालिका– १२ देखतभूली अग्लीपट्टीका इतवरीया राना निकै खुसी छन् । नगरपालिकाको न्यायिक समितिले उनको उजुरी आएको दुई दिनमै अंश पाउने गरी विवादको टुङ्गो लगाइदिएको थियो ।

झण्डै तीस वर्षअघि राना परिवार बस्दै आएको दुई बिघा दर्ता भएको जग्गा र तीन बिघा ऐलानी जग्गा दोदा नदीले कटान गरी बगाएको थियो । 'जग्गा कटान भएको दुई दशकपछि नदीले बहाव परिवर्तन गर्दै  जग्गा भएर बग्न छाडेपछि चारजना बुबाको अंश लाग्ने जग्गामा तीन जना बुबाका छोराहरूले खेती गर्न थालेका थिए,' रानाले भने, 'मैले अंश माग्न खोज्दा गालीगलौज र कुटपिट गर्न आउन थाले, त्यसपछि अंशकै लागि नगरपालिकाको न्यायिक समितिलाई गुहारेँ ।'

दुवै पक्षलाई सँगै राखेर न्यायिक समितिको इजलासमा छलफल बहस भयो । विगतका कटुतालाई बिर्संदै चार वटै बुबाका छोरा बन्धा, सन्धा, सुकराम बसेर अंश दिने सहमति गरेको इतवरीयाले बताए ।

'वर्षौँदेखि आफ्ना दाजुभाइसँग जग्गाकै लागि बोलिचाली बन्द गरेका थियौँ,' उनले भने, 'न्यायपालिकाको पहलमा भाइहरू सँगको सम्बन्ध स्थापित भएको छ, अंशबाट वञ्चित थिए, त्यो पनि पाएँ ।' भोगचलन गर्दै आएको ऐलानी जग्गाबाट छ कठ्ठामा भोगचलन गर्न दिने गरी सहमति गरिएको नगरपालिकाको न्यायिक शाखाका कर्मचारी सुरेन्द्रप्रसाद भट्टले बताए ।

'राना बन्धुको वर्षौ देखिको जग्गा विवाद रहेको थियो,' उनले भने, 'पक्षविपक्षलाई सँगै राखेर उजुरी आएको दुई दिनमै छलफल गरी सौहार्दरुपमा विवाद टुङ्ग्याएका छौँ ।' वडाध्यक्ष, न्यायिक समितिका संयोजक, जग्गा नापजाँच गर्ने अमिनको रोहबरमा फिल्डमा गएर जग्गा बाँडफाँड गरिने भएको उनको भनाइ छ ।

स्थानीय सरकार सञ्चालन ऐन २०७४ को दफा ४७ अनुसार न्यायिक समितिको अधिकार क्षेत्रभित्र पर्ने भएकाले आइन्दा दुवै पक्षले मिलेर बस्ने, एक अर्कालाई गाली बेइज्जती नगर्ने सम्बन्धमा दुवै पक्षलाई न्यायिक समितिमा उपस्थित गराइ छलफल गराइ मिलापत्रसमेत गरिएको उनले उल्लेख गरे । नगरपालिकाका न्यायिक समितिको संयोजक तथा उपप्रमुख कल्पना पन्तका अनुसार रानाका जस्तै न्यायिक समितिमा ज्याला मजदुरी, रकम लेनदेन, जग्गासम्बन्धी, अंश, बाटो, कुुलो, खानेपानी सम्बन्धका २४ विवादमा चालु आर्थिक वर्षमा मिलापत्र गरिएको छ ।

दुई  विवादका उजुरी विचाराधीन छन् । न्यायपालिकामा छ वटा नयाँ विवाद दर्ता भएका छन् । दुई विवाद गत वर्षबाट सरी आएको उनको भनाइ छ । न्यायपालिकामा आएका सबै विवादको पक्षविपक्षलाई सँगै राखेर जितजितको भावना राखेर मिलापत्र गराइदै आएको नगर उपप्रमुख पन्तको भनाइ  छ ।