रौतहट— इमर्जेन्सी जनसेवा हस्पिटल बिर्तामा उपचारका क्रममा एक महिलाको मृत्यु भएपछि मृतकका आफन्त आक्रोशित भएका छन् । चन्द्रपुर नगरपालिका–७ बनबौहरीका इब्राहिम सिद्धिकीकी ३० वर्षीया श्रीमती नुर्जहान खातुनको पाठेघर अप्रेसन गर्ने क्रममा मृत्यु भएपछि आफन्त आक्रोशित भएका हुन् । चिकित्सकको लापरबाहीका कारण श्रीमतीको मृत्यु भएको श्रीमान् इब्राहिमले आरोप लगाएका छन् ।

अप्रेसनमा चिकित्सकले लापरवाही गरेका श्रीमतीको ज्यान गएको उनको भनाई छ । अस्पतालका चिकित्सकले बिरामीलाई वीरगञ्जको मेट्रोसिटी हस्पिटलका लागि रेफर गरेपनि त्यसभन्दा अघि नै ज्यान गएको उनको आरोप छ ।खातुनको मृत्यु भएपछि सञ्चालक राजेन्द्र महतो र चिकित्सक हस्पिटल बन्द गरेर फरार छन् । फरार भएका सञ्चालक महतो र चिकित्सकको खोजी भइरहेको तथा घटना सम्बन्धमा आवश्यक अनुसन्धान भइरहेको इलाका प्रहरी कार्यालय गरुडाले जनाएको छ ।

मृतकका आफन्तले उपचारमा संलग्न चिकित्सकको सर्टिफिकेट, एनएमसी नम्बर कागजात जाँच गर्नुपर्ने र अप्रेसन गर्न अनुमति प्राप्त नगरेको ठहर भए हदैसम्मको कारबाही गर्नुपर्ने माग राखेका छन् । यसअघि देवाहिगोनाही नगरपालिका–९ धरहरीमा रहेको नेपाल लाइफ हस्पिटलमा एक सुत्केरीको उपचारका क्रममा मृत्यु भएको थियो । सो घटनापछि हस्पिटलका सञ्चालक फरार छन् ।

गरुडा ननगरपालिका वडा–१ जयनगरमा रहेको रौतहट कान्ति बाल मेमोरियल हस्पिटल पनि बन्द छ ।  यसका  सञ्चालक पनि फरार छन् । 

रौतहटका पालिकाले स्थानीय स्वास्थ्य ऐन, नियम र कार्यविधि बनाउन सकेका छैनन् । स्थानीय सरकार सञ्चालन ऐन २०७४ को दफा १०२ को उपदफा १ बमोजिम ऐनको मस्यौदा बनाएर नगर, गाउँसभाले पास गर्नुपर्ने भएपनि स्थानीय सरकारले ऐन, नियम, कार्यविधि बनाउन ढिलाई गरेका छन् । 

संविधानले स्थानीय सरकारलाई ऐन, नियम, कार्यविधि बनाउने अधिकार दिएको छ । तर यहाँका स्थानीय सरकारले यसतर्फ ध्यान नदिएकाले नै बिनाअनुमति अवैध निजी अस्पतालहरू खोल्ने गरेको पाइन्छ ।  नियमानुसार २५ बेडसम्मको निजी अस्पतालहरू सञ्चालन गर्न दिने अधिकार स्थानीय तहलाई छ । दर्ता, नवीकरण र अनुगमन गर्ने अधिकार स्थानीय सरकारलाई नै दिएको भएपनि ऐन नबन्दा अन्यौल छ ।

मधेस प्रदेशभरका सबै पालिकाहरूमा रहेका अस्पतालहरूको दर्ता वा नवीकरणको तथ्यांक लिने काम भइरहेको सामाजिक विकास मन्त्रालय, मधेस प्रदेशले जनाएको छ ।