काठमाडौं— शुक्रबार राति गएको भुकम्पमा परी अहिलेसम्म रुकुमपश्चिममा ३५ जनाको मृत्यु भएको छ भने ५३ जना घाइते छन् ।
जिल्ला प्रहरी कार्यालयका प्रहरी नायब उपरिक्षक (डीएसपी) नमराज भट्टराईका अनुसार अहिलेसम्मको अद्यावधिक सूचना संकलन गर्दा आठविसकोट नगरपालिकामा २८ जना र सानीभेरी गाउँपालिकामा सात जनागरि ३५ जनाको मृत्यु भएको हो ।
उनका अनुसार आठविसकोट नगरपालिका वडा नम्बर ११ मा ६ जना, वडा नम्बर १२ मा ३ जना, वडा नम्बर १३ मा स७ जना, वडा नम्बर १४ मा १२ जना मृत्यु भएको हो । त्यस्तै सानीभेरी गाउँपालिका वडा १ मा ४ जना, वडा नम्बर २ मा १ जना र वडा नम्बर ४ मा दुई जनाको मृत्यु भएको प्रहरीले जनाएको छ ।
भूकम्पमा परी दुई वटा पालिकामा ५३ जना घाइते भएका छन् । घाइतेहरुको चौरजहारी अस्पताल, जिल्ला अस्पताल सल्ले र आठविसकोट नगर अस्पतालमा उपचार भइरहेको छ ।
शुक्रबार राती ११ बजेर ४७ मिनेटमा जाजरकोटको रामिडाँडा केन्द्रबिन्दु भएर ६.४ म्याग्निच्युडको भूकम्प गएको थियो ।
