तनहुँ— नेपाली कांग्रेसको तर्फबाट तनहुँ–१ बाट प्रतिनिधी सभा उम्मेदवार गोविन्द भट्टराई राष्ट्रिय स्वतन्त्र पार्टी (रास्वपा) का सभापति रवि लामिछानेलाई कटाक्ष गर्दै आफ्नैबारे जानकारी नहुने नेताले देश चलाउन नसक्ने बताएका छन् ।
भानु नगरपालिका–२ नारेश्वरटारमा शनिबार मतदाता भेटघाट कार्यक्रमलाई सम्बोधन गर्दै भट्टराईले नागरिकता त्यागेपछि फेरि लिनुपर्छ भन्ने हेक्का नहुनेले देश चलाउने सामर्थ नराख्ने दाबी गरे ।
रास्वपाको तर्फबाट तनहुँ–१ कै उम्मेदवार डा.स्वर्णिम वाग्लेप्रति लक्षित गर्दै भट्टराईले जिल्लाको विकासमा कुनै योगदान नदिएका, राजनीति केहो भन्ने थाहा नपाएका प्रतिस्पर्धी हुँदा आफ्नो जित सुनिश्चित रहेको बताए ।
नेकपा माओवादी केन्द्र भानुका इन्चार्ज सीताराम अधिकारीले गठबन्धनको भोटले गर्दा नै मंसिर ४ को निर्वाचनमा गठबन्धनका उम्मेदवार भारी मतान्तरले विजयी भएकोले वैशाख १० मा पनि जित सुनिश्चित भएको दाबी गरे ।
सरकारको स्थायित्व र विकासको लागि गठबन्धनले जित्नुपर्ने उनको भनाइ थियो ।
